Group Blog All Blog
|
ตอนที่ 6 อาหารอีสาน เมนูที่ 6 แกงไก่ใส่หน่อไม้ส้ม 30-8-59
ตอนที่ 6 แนวกินอีสานบ้านเฮา 100 เมนู เมนูที่ 6 แกงหน่อไม้ส้มใส่ไก่  สวัสดีกันงามๆเนาะครับ พ่อแม่พี่น้อง เป็นคนไทยกะต้องไหว้ให้ถูกต้อง แม่นบ่ หายไปโดนๆ คึดฮอดอยู่ แต่ว่าบ่มีเวลาแวะมาทักทายกันเนาะ ศรี ศรี มื้อนี้เป็นมื้อสันต์วันดี มื้อประเสริฐอยู่ทุกคน (กำลังตั้งใจฮ้อง บักขาวหมาที่บักอ้ายเลี้ยงเอาไว้มันดันหอนขึ้นมา พอแล้ว พอเนาะ) เอ้า บ่แม่น เนาะ บักอ้ายบ่ได้มาสู่ขวัญ ลืมไป แค่สิมาชวนกิน แกงไก่ใส่หน่อไม้ส้ม เฮ็ดไปทั่วทีปเนาะสู เอาเป็นว่ามื้อนี้บักอ้ายสินำเสนอ แกงไก่ใส่หน่อไม้ส้ม สูตร คนอีสานขนานแท้ พะนะ เอารูปที่แปะอยู่ทั้งหัวไปเบิ่งเอิ้นน้ำย่อยก่อน เป็นจังได๋ เป็นตาแซ่บบ่ พุ้นนะ อีพ่อเพิ้น เทเหล้าขาวมาให้แล้ว เพิ้นบอกว่ายกให้จักโบกแน่ พ่อครัวสิได้เฮ็ดกับข้าวแซ่บๆ เราว่าจั่งซั่น เอ้า เอามาอีพ่อ เปิดเอื้อยศิริพร นำเด้อพ่อ ขอฟังลำก่อนจักกลอน ว่าแล้วเรากะเปิดวิทยุให้อ้ายฟังโลด ย่าวๆๆๆๆ ยะ ย่าวๆ ยะ ย่าวๆ เด้อๆนางเด้อ เด้อนางเด้ ตึ้กๆ  เว้าหลายเหม็นขี่แข่ว บ่ได้ลงมือเฮ็ดจักเท่อหนึ่งเนาะ อีพ่อเพิ้นบอกว่า เพิ้นซื้อปีกไก่มาจากตลาดแล้ว มื้อนี้เฮาจั่งต้องใช้ไก่ที่เพิ้นขายแทนไก่บ้านเนาะ อีพ่ออีแม่เพิ้มเฒ่าแล้ว สิให้มากินไก่บ้านมันเหนียว เดี๋ยวสิหย่ำบ่ได้ เพิ่นว่าจั่งซั่น เพิ้นว่าคุมื้อนี้วิถีชีวิตมันเปลี่ยนไปหลาย เว้าให้ฟังเนาะ แต่ก่อนสมัยที่บักอ้ายเป็นเด็กน้อย อาหารการกินมันกะหายากย๊าก มีอีหยังกะต้องกินไป คันมื้อได๋ฆ่าไก่ มันกะต้องเป็นมื้อพิเศษอีหลี เด็กน้อยจั่งอ้ายกะสิ ตื่นเต้นคัก ตื่นเต้นตั่งแต่ไปจับไก่แล้ว เอาข้าวเปียกไปหว่านให้มันมากิน สิเอาโตได๋กะค่อยเลือกเอา หลังจากนั้นกะแล่นจับไก่กันให้ม่วนไปโลด หลังจากจับไก่ได้แล้ว อ้ายกะบ่เว้าต่อเด้อ สิโตนไก่ ส่วนอีแม่เราไปจกหน่อส้มจากไห หน่อไม้นี่เรากะเฮ็ดเอง บ้านอ้ายอยู่ติดภูเนาะ หน่อไม้กะบ่อึดบ่อยากดอก อีแม่เราว่า หน่อไม้ส้มคันบ่เฮ็ดเองมันบ่แซ่บ เราว่าจั่งซั่น เรากะเอาหน่อไม้ส้มมาล้างท่าโลด หลังจากนั้นอีพ่อกะเตรียมไก่ จึงได้ลงมือเฮ็ดแกงไก่ใส่หน่อไม้ส้ม ส่วนเด็กน้อยคืออ้ายกะสิไปนอนท่า แต่กี้แต่ก่อนมันคือจังโดนๆเด้ ทุ่มสองทุ่มจึงค่อยสิได้กิน คุมี้นี้สองทุ่มแปปเดียว เวลาได้กินมันกะแซ่บคัก อ้ายคิดว่ามันเป็นเพราะว่า คุอย่างมันเต็มไปด้วยความฮัก มันจั่งแม่นแซ่บคัก เด็กน้อยนอนหลับไปก่อนกะมี พอแล้วแล้วผู้ใหญ่กะสิมาปลุก ส่วนตัวอ้ายเป็นลูกชายหล้าเนาะ ลูกหล้าสิได้กินตับไก่ บ่แม่น ตับๆๆ แบบทุกมื้อนี้เด้(แอบหัวเราะเจ้าของ) เอ้ามาเข้าเรื่องกันโลด มาเบิ่งว่าแกงไก่ใส่หน่อไม้ส้ม สูตร เต็มไปด้วยความฮัก มันเป็นจั่งได๋ พุ่นนะ เว้าไปทั่วทีปถั่วแดนเนาะ มาเบิ่งมาว่าใส่อีหยังแน่ หน่อไม้ส้ม(อีแม่เพิ้นเฮ็ดเอง ดองไว้ฮั่งโดน ฮั่งดี) เนื้อไก่ มื้อนี้ใช้ไก่ ซื้อมาจากตลาด เป็นปีกไก่ ผักอีตู่ ใบบักกรูด ใบผักบั่ว(ต้นหอม) น้ำปลา น้ำตาล น้ำบักขามเปียก น้ำปลาร้า บัดที่นี่มาฮอดพริกแกง มีหัวคิ่งไค้ ข่า กระเทียม พริกแห้ง ผักบั่ว (หอมแดง)     พอเตรียมครบแล้ว กะได้เวลาลงมือเฮ็ด อีแม่ฮ้องมา เฮ็ดแซ่บๆเด้อ บักหล้า อย่าให้เสียชื่อ แม่ใหญ่นวล พุ่นแล้ว เพิ้นมีชื่อเรื่องเฮ็ดแนวกิน เพิ้นบอกว่า เห็นบ่ พ่อเมงไปไส่บ่ได้ เพราะว่าแนวกินกรูนี่ล่ะ ส่วนวิธีเฮ็ดกะเริ่มโลด หั่นไก่เอาไว้ให้มันพอดีคำ เด็ดผักอีตู่ ฉีกใบบักกรูด หั่นใบผักบั่วเตรียมไว้โลด แล้วๆกะจั่งมาตำพริกแกง เอาเครื่องพริกแกงทั้งหมดตำให้มันพอละเอียดเนาะ  ตั้งกระทะให้มันฮ้อน บ่ต้องใส่น้ำมันเด้อ เดี๋ยวน้ำมันมันกะสิออกมาเอง เอาไก่ลงไปคั่วจนใกล้สุก จั่งเอาพริกแกงลงไปผัดให้มันหอม เอาให้คนหมดบ้านจามสนั่น นั่นล่ะ เป็นอันใช้ได้ แสดงว่าคือสิแซ่บหลาย แล้วๆกะจั่งเติมน้ำลงไป ท่าให้มันเดือดปุดๆ จั่งเอาหน่อไม้ส้มใส่ ท่าให้มันเดือดอีกเทื่อ หน่อไม้ส้มสิช่อยให้ไก้นุ่มขึ้นเอง ปรุงรสด้วย น้ำปลา น้ำบักขามเปียก น้ำตาล และกะน้ำปลาร้า (พระเอกหมอลำเลยเด้) ทิ่มไว้ยังคราว ค่อยใส่ผักอีตู่ กับ ผักบั่ว   สุกแล้วกะยกลงมาโลด ตักใส่ถ้วย เอาไปกินกับข้าวเหนียว แซ่บคัก  พุ่นนะ อีพ่อเพิ้นรินเหล้าขาวมาอีกแล้ว หมอลำกะยังย่าวอยู่ รู้ว่าบักอ้ายมักม่วนหลาย สิได้กินข้าวบ่น้อมื้อนี้ คือสิเมาเหล้าก่อนเนาะ จบแล้วขอบักอ้ายไปกินข้าวก่อนเด้อ มีอีหยังกะยกออกมากินโลด คันมักกะกดซับสะไคร้ข่างล่างโลด (เหอๆ กล้าเด้อ เว้าภาษาปะกิดนี่ มันแม่นบ่เนาะ)  ไว้พ้อกันใหม่เด้อครับ (ผิดตกอ้ายขออภัยเด้อ) ตอนที่ 5 อาหารอีสาน เมนูที่ 5 แจ่วบองของแท้ 30-8-59
ตอนที่ 5 แนวกินอีสานบ้านเฮา 100 เมนู เมนูที่ 5 แจ่วบองของแท้  เหลียวเบิ่งตะเว้นขึ้นสื่อหัว มันคือฮ้อนฮักฮ้อนแน่แท้น่อ อยากสิแก้ผ้าลงไปแช่น้ำคือ พวกงัวพวกควายเด้น้อสู อากาศฮ้อนจั่งซี้ มาๆ ลงไปนอนเล่นเถียงนานำกัน ก่อนสิไป ขอบักอ้ายเข้าครัวตำแจ่วบองปลาร้าห่อไปกินทุ่งนาก่อนเด้อ มาท่าแม้ เข้ามาซ่อย บักอ้ายเฮ็ดแจ่วบองปลาร้า สูตรคนอีสานขนาดแท้แม้ พู้นน่ะไปเอาตั่งมานั่งใกล้ๆไป๋ สิได้เห็นคักๆ ก่อนอื่นกะมาเบิ่งเนาะมามีส่วนประกอบอีหยังแน่ พระเอกมาก่อนเป็นอันดับแรกโลด กะคือปลาร้านี่ล่ะ ปลาร้าปลากิเดิด อีแม่เพิ้นหมัก เอาไปหลายปีแล้วเด้ไหนี่ ตักมาโลดถ้วยหนึ่ง ตักเอาน้ำปลาร้ามันมานำเด้อ มันจั่งสินัวคักแน่ อันดับสอง(ป้าดๆๆคำเว้ามันคือมาหรูหราคักแท้ล่ะน้อบักอ้าย) เอ้า!!ย่าวต่อโลด อันดับที่สองกะคือเกลือเม็ด ซื้อมาจากระยองตอนไปเที่ยวเกาะเสม็ดแม้ ส่วนเรื่องที่บักอ้ายสิเสร็จบ่เสร็จอันนี้ขอเก็บไว้ฮู้ผู้เดียวพอ บ่อยากเว้าให้มันหลายความ555 บัดที่นี้กะหยิบเอาบักพริกที่ตากแห้งเอาไว้ออกมา ส่วนเครื่องหอมสมุนไพร ข่า หัวคิ่งไค(ตะไคร้) ใบบักกรูด กะไปขุดมาให้จากข้างๆฮั้วบ้านนี่ล่ะ บักอ้ายปลูกเอาไว้หลายโพด ผู้ได๋มาขอบักอ้ายกะบ่อหวง ไปขุดเอาโลด บ่ว่าดอก บักอ้ายลุกขึ้นยืนดึงเอาหัวผักกระเทียม กับผักบั่ว(หอมหัวแดง)ลงมาจากข้างฝา อีพ่อเพิ้นเอามาปลูกเอาไว้เป็นพวงย้อยย่ำย่างอยู่ เพิ้นว่าผูกไว้จั่งซี่หัวกระเที่ยวมันจักสิบ่ลีบพะนะ ส่วนเครื่องปรุงกะมี เกลือ น้ำตาล น้ำปลา ซั่มนั่นล่ะ   คันถามบักอ้ายว่าแจ่วบองปลาร้าสูตรอีสานขนาดแท้ของบักอ้ายต่างจากสูตรของผู้อื่นจั่งได๋ แจ่วบองของบักอ้ายบ่ใส่บักขามเปียก จั่งว่าสูตรไผ๋สูตรมันเนาะสู มันบ่มีแนวได๋ผิดหรือถูกดอก แล้วแต่มักโลด ไปๆ ขยับไปแน่เดี๋ยวบักอ้ายสิลงมือเฮ็ดแล้ว ปลาร้าเอามาสับให้มันแหลก ย้ำชัดๆเด้ สับให้มันแหลกๆๆๆๆ (อย่าให้เหลือก้างแม้แต่อันเดียว) โพ้นน่า หรอยเว้าภาษากลาง เท่คักบ่ สับแล้วกะเอาใส่ถ้วยไว้ อย่าเทน้ำปลาร้าทิ่มเด้อ เก็บไว้นำกันนั่นล่ะ  ต่อมากะหั่นพวกเครื่องหอม ข่า หัวคิ่งไค ใบบักกรูด กระเทียม ส่วนผักบั่วค่อยหั่นทีหลังหมู่ ฮือ ๆ ๆ ๆ บักอ้ายบ่ได้เป็นหยังดอก น้ำผักบั่วมันเด็นเข้าตา น้ำตามันเลยไหลออกมาจั่งซี้ล่ะอีนางเอ้ย บ่ต้องห่วงบักอ้ายดอก บักขี้โม้อ้ายเอ้ย เอามีดแช่น้ำก่อนเด้อ แล้วค่อยเอาไปหั่นผักบั่ว(หอมแดง) เดี๋ยวน้ำตาสิไหลลงไปในแจ่ว บ่มีผู้ได๋อยากกินเด้เสียงอีแม่ฮ้องบอก (แม้ๆๆๆๆ มีเคล็ดลับไม่ไม่ยอมบอกนะคุณแม่)บักอ้ายถึงกับอุทานเป็นภาษากลาง มาบอกปานนี้มันสิทันบ่ ข้อยเสียน้ำตาเป็นกะคุแล้วเด้อีแม่ เอาไว้เที่ยหน้ากะแล้วกันเนาะ ข่อยสิบ่ลืมเอามีดแช่น้ำก่อนหั่นผักบั่วเด็ดขาด หลังจากหั่นหมดคุสิ่งคุอย่างแล้ว เอากะเอาไปคั่วกับไฟอ่อนให้มันหอม คันมีเตาถ่าน กะเอาย่างกะได้คือกัน แต่ว่ามื้อนี้บักอ้ายขี้คร้านดังไฟกะเลยเอาใสกระทะคั่วเอาโลด แล้วๆกะเอามาตำ ตำทุกอย่างที่เฮาคั่วเด้อ เอ้า!!!มานั่งเบิ่งตาเหลี่ยมเม้าๆ อยู่ซื่อๆเฮ็ดหยังน้อ มาซ่อยบักอ้ายตำท่าแม้ ตำผู้เดียวมันเมื่อยมือเด้ จั่งสั่นล่ะ ตำแล้วกะแยกกันเอาไว้ ตำบักพริกก่อน จากนั่นกะค่อยตำพวกเครื่องหอมเด้อ   ตำแล้วกะเอาชามมา บักอ้ายใช้วิธีเอาบ่วงคุกเอานอกครกเด้อ บ่เอามาตำรวมกัน เพราะว่ามันล้นครก(บ่มีเหตุผลอื่นดอก) ใส่ปลาร้าลงไป ตามลงไปคือบักพริกป่น แล้วกะข่า หัวคิ่งไค บักบั่ว กระเทียม ใบบักกูด และกะเกลือที่ตำแหลกแล้ว เรียบร้อยใส่ลงไปในชามคนโลด บัดที่นี่กะคนให้มันทั่วๆ อย่าฟ้าวหยุดแม้ คนให้มันเข้ากันก่อน คนจนเนื้อมันเนียนละเอียด เอ้าใช้ได้แล้ว สุดท้ายกะเติมน้ำตาล แล้วกะนำปลา ลงไปแนวละช้อน แล้วๆเด้อ เอากะปุกมาใส่ ไปพายเอากล่องข้าวไป เดี๋ยวสิได๋ไปนอนเล่นโถ่งนานำกัน อย่าฟ้าวไป เอาใส่ใบตองย่างไฟให้พ่อแน่ เพิ้นจ่มว่าเจ็บท้อง บ่อยากกินดิบๆ อีแม่ย่างเข้ามาในครัว กะบอกแล้วเนาะว่าขี้คร้านดั่งไฟ เจ้าเฮ็ดเอาเองโลดอีแม่ ข่อยไปนาแล้ว ฮ้อนหลายสิฟ้าวไปโดดน้ำเล่น บักอ้ายฟ้าวแล่นหนีออกมา ห่าคั่วเมงเอ้ยบักอ้าย แม่ใช่แม่วาน เมงเฮ็ดให้บ่ได้ท่าแม้ บักผีบ้า เสียงอีแม่ป้อยไล่หลังมา เอ้าแล่นนำบักอ้ายให้ทันเด้อ ก่อนสิโดนด้ามฟืนอีแม่ ไปพ้อกันทุ่งนาเด้อครับทุกผู้ทุกคน   จบแล้วครับม่วนบ่ คันม่วนกะบอก มื้อหน้าสิเอาแนวกินอย่างอื่นมาเว้าสู่ฟังอีก ตอนที่ 4 อาหารอีสาน เมนูที่ 4 ลาบบักเขือ สูตร ลาวแง้ว 30-8-59
ตอนที่ 4 แนวกินอีสานบ้านเฮา 100 เมนู เมนูที่ 4 มื้อนี้บักอ้ายขอนำเสนอ ลาบบักเขือ แนวกินเฉพาะกลุ่มของซาว ลาวแง้ว (ลาวแง่วคือซาวลาวเวียงจันทร์ที่อพยพมาตั้งบ้านเฮือนอยู่ที่ จังหวัด ลพบุรี สิงห์บุรี แล้วก่า สุพรรณ)  เอ้า ว่าแล้วกะมาเบิ่งนำกันโลด เริ่มจากส่วนผสม เน๊าะ  หมากเขือเปราะกะเทาะหน้าแว่นนี่ล่ะพระเอกโลด หมากแค้ง (มะเขือพวง)  ปลาทูนึ่ง  เกลือ หมากพริก หมากพริกหยวก กระเทียม หอมแดง ข่า ตะไคร้ ใบบักกูด น้ำปลาร้า ใบโหระพา    มาฮอดวิธีเฮ็ดโลด นำปลาทูลงต้มกับน้ำปลาร้า แล้วๆกะเอามาแกะเนื้อเตรียมเอาไว้  เอาบักเขือกับบักแค้งแช่น้ำเกลือ ก่อนแล้วค่อยเอาไปต้มเด้อ ต้อมจนสุกกะพักเอาไว้  แล้วๆกะเอาพริก บักพริกหยวก กระเทียม หอมแดง ไปคั่วไฟให้มันห๊อมหอม  แล้วจั่งยกลงมาตำให้แหลก  ใส่เนื้อปลาทูลงไปตำ พอเฮาตำจนแหลกแล้ว กะใส่บักเขือกับบักแค้งต้มลงไปตำให้แหลก  แล้วๆบัดที่นี้ก็ตักมาใส่ชาม  เอาน้ำปลาร้าต้มสุกลงไปคน ปรุงรส ถ้าต้องการเค็มอีกนิดเติมน้ำปลาได้ เติมน้ำตาลพักเอาไว้   บัดที่นี้กะเอาหอมกับกระเทียมลงไปเจียวในน้ำมันจนหอม  แล้วจั่งเอาลาบบักเขือของเฮาลงไปผัด  ผัดให้หอม แล้วจั่งใส่ใบโหระพา  แล้วๆกะเสริฟโลด ตุ้ยกับข้าวเหนียวเด้ ป้าดถิโธ่ มันคือแซ่บแท้ๆหนอ พ่อแม่พี่น้อง  จบแล้วครับ ตอนที่ 3 อาหารอีสาน เมนูที่ 3 เมี่ยงหมูย่างจิ้มแจ่ว 30-8-59
ตอนที่ 3 แนวกินอีสานบ้านเฮา 100 เมนู เมนูที่ 3 เมี่ยงหมูย่างจิ้มแจ่ว
บ่อยมากแล้ว น่าจะลองทำอย่างอื่นทานบ้าง เลยเกิดไอเดียว่า ถ้าทำหมูย่างทาน แบบเมี่ยงราดด้วยน้ำจิ้มแจ่วแซ่บๆก็คงจะเข้ากันไม่น้อย เมื่อตัดสินใจได้แล้ว ก็ไปตลาดกันเลย ไปตลาดสดแถวๆบ้านนี่แหละ สะดวกดี รากผักชี ข่า ตะไคร้ กระเทียม ซอสหอยนางรม ซีอิ้วขาว น้ำปลาแท้ น้ำตาล พริกไทบป่น มะขามเปียก น้ำตาลมะพร้าว มะนาว น้ำปลา พริกป่น ข้าวคั่ว ต้นหอม หัวหอม ผักชี ซอย ให้แหลก แล้วนำไปหมักกับเนื้อหมู เติมน้ำมันหอย น้ำปลา น้ำตาลทราย พริกไทยป่นและซีอิ๊วขาวกะให้รสชาติกำลังดี อย่าให้รสจัดจนเกินไป เสร็จแล้วจึงนวดหมูให้เข้ากับเครื่องหมักทั้งหมด หลังจากนั้นจึงนำไปแช่ตู้เย็นเอาไว้ขั้นต่ำ 1 ชั่วโมง แต่ถ้ามีเวลาหมักทิ้งไว้ 3 ชั่วโมง จะเด็ดที่สุด
แล้วจึงหั่นเป็นชิ้นให้พอดีครับ และหัวใจสำคัญคือเง้าอ่อนของกระชาย อย่าลืมใส่เง้ากระชายอ่อนทุกคำนะครับ ตอนที่ 2 อาหารอีสาน เมนูที่ 2 ลาบเลือด พะนะ 30-8-59
ตอนที่ 2 แนวกินอีสานบ้านเฮา 100 เมนู เมนูที่ 2 มื้อนี้ บักอ้าย เต็มใจนำเสนอ V V v v v V v V V V V V ลาบเลือด  มื้อนี้หมู่ฮักหมู่แพงที่เคยผูกเสี่ยวกันตั่งแต่อ้ายยังเป็นเด็กน้อย โทรศัพท์มาบอกว่าสิแวะเข้ามาหาที่บ้าน ป้าด!! อ้ายสิมีอีหยังต้อนฮับขับสู่เพิ้นน้อ หงวกแนมเบิ่งรอบๆ เอ้า!!น้อ มันเป็นธรรมเนียมแล้วแม่นบ่ หมู่มาหามายามเฮากะต้องตั้งวงก้งเหล้ากัน คันสิตอกเหล้าสองซาวคือ แต่เก่ากะคงสิบ่ไหวแล้ว เพราะว่าร่างกายกะเริ่มระโหยโรยรา ไปหลายเติบ บ่แม่นผู้บ่าวซำน้อยคือแต่เก่าก่อน เอาจั่งซี้กะแล้วกันเนาะ ขับรถไปตลาด ซื้อเบียร์มาจักลัง (ลังหนึ่งกินสามคนกำลังพอดี แม่นบ่)พอยกลังเบียร์ใส่ท้ายรถแล้ว อ้ายกะมาคึดว่า เอ๋!!!มันขาดอีหยังอีกน้อ มีเบียร์เย็นๆแล้ว มันกะสิน่า สิมีกับแก้มจักน้อยแม่นบ่ ตากะเหลือบไปเห็นแผงขายหมูแม้ ป้าดมันคือเป็นตาแซ่บคักแท้ แค่คิดอ้ายกะน้ำลายสอ เพราะว่าบ่ได้กิน โดนเติบแล้ว เอ้า!! ลาบเลือดนี่ล่ะ กับแก้มชั้นดีคัก รับรองโลดว่ามันสองหมู่นั้น มันกะต้องถืกอกถืกใจล่ะวะ ตัดสินใจได้แล้วกะตรงไปแผงร้านขายหมูโลด พ่อค้าเอาหมูสับร้อยหนึ่ง เอาตับ กับไส้นำเด้อ เอาเลือดบ่อ้ายพ่อค้าถาม สิขาดได้ลือ เลือดนิมันคือพระเอกเลยตั่ว แต่ว่าอ้ายบ่เอาเลือดพ่อค้าเด้ เอาแต่เลือดหมูนั่นแลว หลังจากต่อปากต่อคำกับพ่อค้าพอม่วนๆแล้วกะฟ้าวขับรถกลับมาบ้าน ย่านพ่อค้าสิสูน คว้ามีดบังตอเฉาะหัวอ้ายเอา ประเดี๋ยวสิได้เลือดเจ้าของก่อนเลือดหมู (อันนี้เว้าเล่นให้มันม่วนๆเนาะ คนไทยนำกัน บ่ใช้ความรุนแรงดอก) กลับมาฮอดบ้านแล้วจะจัดการเอาเบียร์แช่ช่องฟิตตู้เย็นโลด มันสิได้เย็นๆ คันแช่โดนๆ กะสิได้กินเบียร์วุ้นพะนะ  หลังจากนั้นกะไปเตรียมตัวเฮ็ดลาบเลือดกันโลด มาเด้อพี่น้องมาเบิ่งบักอ้ายเข้าครัวเฮ็ดลาบเลือด ฮิ้ว อันดับแรกเตรียมชามมาก่อน ล้างก่อนเด้อ ป้องกันเชื้อโรค หลังจากนั้นกะนำเลือดสดๆไปคั้นกับใบตะไคร้ มันสิได้ดับกลิ่นคาว อ้ายบ่มีรูปตอนคั้นให้เบิ่งเด้ มือเปื้อนเลือด ย่านมันเปื้อนไอโฟนหกเอส 555 บักขี้คุยเอ้ย!!! บอกเพิ่นไปแม้ว่าอีหลีแล้วเจ้าใช้โทรศัพท์ มือถือรุ่น ฮีโร่ ตกบ่แตก บัดนี้กะมาเบิ่งเครื่องปรุงทั้งหมดทั้งมวลกันในการเฮ็ดลาบเลือดกัน บ่มีปริมาณบอกเด้ กะเองโลด แล้วแต่มัก มักอีหยังกะใส่แบบนั่นละ ง่ายบ่ หมูสับ ไส้หมู ตับหมู ใบสาระแหน่ บักนาว น้ำปลา ข้าวคั่ว (คั่วเองเด้อครับ คันไปซื้อเพิ่นมันคั่วไว้โดนแล้วบ่หอม) พริกป่น (อันนี้กะคั่วเองคือกัน ยุ่งยากจักหน่อย แต่มันได้ใจกว่าซื้อเนาะ) ต้นหอม ผักชี ผักชีใบเลื่อย หอมแดง ผงนัว (ผู้ได๋บ่บักก็บ่อต้องใส่กะได้)      มาฮอดขั้นตอนแล้วกะวิธีการเฮ็ดลาบเลือดของเฮา ป้าด!!! ฟังแล้ว ป่านว่าเชพกระทะเหล็กเว้าพะนะ แต่บ่แม้ดอกเด้อพ่อแม่พี่น้อง บักอ้ายมันเป็นได้แค่เชพกระทะซอดซั่มนั้นแหลว อันดับแรกกะเอาข้าวเหนียวดิบๆนี่ล่ะไปคั่วให้หอม บักพริกแห้งนำเนาะ คั่วแล้วกะเอามาตำ กะสิได้ข้าวคั่วกับพริกป่นสดๆใหม่ๆ แล้วๆก็พักเอาไว้ก่อนเด้อ     ที่นี่กะหันมาจัดการกับตับหมูแล้วกะไส้หมู (ไส้นี่ใช้สระไอไม้มลายหรือว่าไม้ม้วนน้อ เฒ่าแล้วอ้ายกะขี้หลงขี้ลืมอยู่คือกันเด้) เอ้า!!เอาตับกับไส้ไปต้มให้สุก ใส่ตะไคร้ลงไปนำจักหน่อย มันสิได้บ่เหม็นคาว ต้มจนสุกเด้อ  จากนั้นกะเอาไส้หมูกับตับ ตับ ตับ ตับ (โอ้ย!!บ่แม่นแล้วบักห่าคั่วเมิงเอ้ย) บ่แม่น ตับ ตับ ตับ คันแบบนั้นเพิ่นเฮ็ดกันในมุ้งบ่แม้นในครัวเนาะสู เอาตับหมูกับไส่หมูที่ต้มสุกแล้ว พักใส่ชามเอาไว้ก่อน (แบบนี้มันจั่งแม่นแนวเนาะอ้ายเนาะ)ท่าให้มันเย็นก่อน อย่าพึ่งใจฮ้อน เดี๋ยวมันจะลวกมือพอกอย่าหาว่าอ้ายบ่บอกบ่เตือนเด้อ พอเย็นจะหั่นตับกับไส้เตรียมไว้ให้พร้อม   แล้วๆแม่นบ่ เอาต้นหอม ผักชี ผักชีใบเลื่อย และกะหัวหอมมาหั่นเตรียมเอาให้เรียบร้อย ส่วนใบสะระแน่กะเด็ดเอาไว้เป็นใบๆ   แต่อย่าฟ้าวเฮ็ดเด้ เดี๋ยวมันสิเซ็งก่อน ท่าหมู่ให้มาฮอดก่อนค่อยลงมือเฮ็ด ระหว่างท่าเฮากะเอาเบียร์ออกมาจิบท่ากะได้ มันสิฮอดหมู่บ่น้อบักอ้าย เว้าแล้วกะอยากหัวเจ้าของ  พู้นๆ เห็นบ่!!เว้าปั๊บมันกะมาฮอดปุบโลด พุ่นนะย่างดังแมบมาแต่ไกลสองคนนั่งล่ะ หมู่อ้าย เห็นบ่ เอ้า มาแล้วบ่ เข้ามาก่อนๆ มามา เบียร์ในตู้เด้อหยิบเอาโลด เดี๋ยวเฮาสิเฮ็กลาบเลือดให้กินถึงได๋แล้วล่ะครับพี่น้อง มาต่อกันโลดเนาะหลังจากนั้นอ้ายกะสิเทหมูสับลงไป ในชามที่เฮาเตรียมเอาไว้โลด  ตามลงไปกะคือไส้กับตับที่เฮาหั่นเอาไว้แล้ว บ่ยากดอก  แล้วกะค่อยๆปรุงรสชาติลาบของเฮาด้วย เติบน้ำปลา ผงนัว น้ำบักนาว คนให้เข้ากันแล้วชิมเบิ่งเอา มักรสชาติแบบไหนกะเติมเอาโลด หลังจากนั้นกะค่อยเติมบักพริกป่น ตามด้วยต้นหอม ผักชี ผักชีใบเลื่อยซอย แล้วกะหอมแดงซอยลงไป คนอีกจักเทื่อ   แล้วเติมเลือดลงไป ป้าด!!!น้ำลายแตกแล้วเด้บัดทีนี้ แล้วๆกะเติม ข้าวคั่วกับใบสะระแหน่ลงไป คนให้ทั่วๆเป็นอันเสร็จ   แล้วแล้วครับผม ตักใส่จานเสริฟโลด    สิกินกับข้าวเหนียวแล้วกะพวกผักสด อย่างบักแตง ผักกาด หรือบักถั่วกะแซ่บคัก หรือว่าสิกินแก้มเบียร์คืออ้ายกะบ่ว่ากัน สำหรับคนที่บ่กินดิบๆ ถ้าย่านเป็นขี้กะตืก กะเอาไปคั่ว กะสิได้ลาบคั่วหน้าตาเป็นแบบนี้ล่ะ    สุดท้ายแล้วเนาะสำหรับมื้อนี้ ลาบเลือด ถ้ามักกะกดไลน์ คันมันใช่กะกดติดตามอ้ายโลด เอาไว้มื้อหน้าฟ้าใหม่จะเอาเมนูบ้านนอกๆแต่หล่อมากมาฝากอีก สำหรับมื้อนี้อ้ายกะขอบคุณชาวพันทิปหลายๆที่ติดตามอ้ายมาตั้งแต่ต้น จนจบ ผิดตกอีหยังอ้ายกะขออภัยไว้นำเด้อ สำหรับมื้อนี้ขอไปต้อนฮับหมู่ก่อน ขอให้ทุกคนมีความสุขหล้ายหลาย อ้ายกะสิขอฝากผญาสอนใจไว้แน่จักหน่อย ม่วนชื่นกันโลด คันได้กินลาบซิ้นอย่าลืมแจ่วแพวผัก คันได้กินพาเงินพาคำอย่าลืมกระเบียนฮ้าง คันเจ้าได้อยู่ยอดฟ้าผาสารทประดับมุข อย่าได้ลืมความทุกข์ยามขี่ควายคอนกล้า คันเจ้าได้ขี่ซ้างกั้งฮ่มเป็นพระยา อย่าได้ลืมสัญญาคำผญาที่เคยเว้า คันเจ้าได้ขี่ซ้างกั้งฮ่มสัปทน อย่าได้ลืมคนจนผู้แห่นำตีนซ้าง (ขอขอบคุณผญาม่วนๆจากผญาสอนใจคนอีสานบ้านเฮา) ส่วนสองเมนูนี้เป็นของแถมเนาะ ย่านหมู่บ่พอกิน หอยแครงลวก   กับต้มขาไก่ใส่ใบบักขามอ่อน(ซดน้ำแก้เมา เพิ้นว่าจั๋งซั่น)  เบียร์กะเป็นวุ้นพร้อมแล้ว มาเด้อ พ่อแม่พี่น้อง  |
บักอ้าย
 ฝากข้อความหลังไมค์ Rss Feed  Smember ผู้ติดตามบล็อก : 23 คน [?] ทำอาหารทานเองไม่ใช่เรื่องยาก ผมทำได้ คุณก็ทำได้ ผมอยากเป็นแรงบันดาลใจให้คุณ เชพฆฤณ Friends Blog Link |
