All Blog
ตอนที่ 35 อาหารอีสาน เมนูที่ 32 ซุปหน่อไม้ส้ม 26-10-59









ตอนที่ 35

แนวกินอีสานบ้านเฮา 100 เมนู  เมนูที่  32

  ซุปหน่อไม้ส้ม








สืบเนื่องจากที่บักอ้ายเคยเฮ็ดหน่อไม้ส้มเอาไว้แล้วเนาะครับ ในตอนที่ 30

คันไผ๋อยากลองเฮ็ดหน่อไม้ส้มกินเอง กะลองกดลิงค์ข่างล่างได้เลยครับผม

//pantip.com/topic/35669004



เมนูที่สินำเสนอในตอนนี้ กะเลยเอิ้นว่าเป็นภาคต่อในตอนที่ 30

นั่นกะคือ ซุปหน่อไม้ส้ม


หลายๆคนกะคงสิมัก ซุปหน่อไม้ส้ม คือกัน เพราะว่าเป็นแนวกินที่ถือว่าครบรสชาติอีหลี

กินกับข้าวเหนียวนี่ แห่งแม่นแนวคักเด้


บ่ต้องช้ามันเสียเวลา บักอ้ายขอนำท่านเข้าสู่ การเฮ็ดแนวกินประจำเมนูที่ 35

(ฟังยิ่งใหญ่ดีเนาะ เหอ ๆ ๆ)



ส่วนประกอบและเครื่องปรุงทั้งหมดกะมีดังต่อไปนี้

หน่อไม้ส้ม เอาออกมาจากกระติกที่บักอ้ายเฮ็ดเอาไว้
บักพริกสดกับบักพริกแห้ง
ปลาทู
บักเขือขื่น
บักนาว
หอมแดง
กระเทียม
งาขาว
ผักชีไทย
ต้นหอม
หอมเป
ผักไผ่





เครื่องปรุงกะมี น้ำปลา น้ำตาล แล้วกะ น้ำปลาร้า










ส่วนวิธีเฮ็ดกะตามนี้เด้อ

เอาหน่อไม้ส้มของเฮาไปล้าง ล้างแล้วกะเอาไปต้มจนสุก

ต้มแล้วกะเอามาล้างอีกเทื่อ ปั้นเอาน้ำออกให้หมด







เด็ดบักพริก แกะหอม กระเทียมเอาไว้

ผักชี ต้นหอม หั่นไว้ ผักไผ่กะเด็ดเอาแต่ใบกะพอ








ส่วนบักเขือขื่นกะเอาเปลือกออก เหลือแต่เม็ดมัน






เอางาขาว บักพริกแห้งมาคั่วให้หอม ส่วนบักพริกดิบ

หัวหอม กระเทียม กะเอามาคั่วคือกัน






คั่วแล้วกะตักออกมาพักไว้ก่อน ท่าให้มันเย็น






ต่อมากะเอาปลาทูมาลงมาต้มกับน้ำปลาร้า ต้มจนปลาทูสุก

กะตักแยกน้ำปลาร้ากับปลาทูออกจากกัน เอาปลาทูมาแกะเอาแต่เนื้อ









มาเริ่มขั้นตอนตำกันโลด

เอาพริกกับหอมกระเทียมลงไปตำก่อน ตามด้วยปลาทู บักเขือขื่น ตำจนแหลก

ค่อยเติมน้ำปลาร้า แล้ว ปรุงรส ด้วยน้ำปลา น้ำตาล แล้วกะน้ำบักนาว ชิมเบิ่ง

พอได้สรชาติที่เฮามักแล้ว กะเอาหน่อไม้ส้มใส่ลงไป ตำให้เข้ากันดี

จั่งเติมพวกผักหอม ผักไผ่ แล้วกะงาขาว คลุกๆ ให้มันเข้ากัน








แล้วตักใส่ถ้วยโลด

แล้วๆแม้ เอาไปกินกับข้าวเหนียว แซ่บๆ เด้ บักอ้ายขอบอก






Create Date : 26 ตุลาคม 2559
Last Update : 30 ตุลาคม 2559 6:42:12 น.
Counter : 330 Pageviews.

1 comment
ตอนที่ 34 อาหารอีสาน เมนูที่ 31 ตำบักหุ่งกุ้งสด 25-10-59








ตอนที่ 34

แนวกินอีสานบ้านเฮา 100 เมนู  เมนูที่  31



ตำบักหุ่งกุ้งสด








เมนูมื้อนี้ บักอ้ายขอนำเสนอ ตำบักหุ่งกุ้งสด

เมนูที่แซ่บอีหลี เหมาะคักแน่กับคนที่มักกินแนวกินรสชาติจัดจ้านจั่งบักอ้าย

อีหลีแล้วสิเอิ้นว่า ฟิวชั่น ฟู้ด กะได้เนาะครับ เพราะเป็นสูตรแนวกินที่ดัดแปลงขึ้นมาใหม่

บ่ได้มีแต่เก่าแต่ก่อน บักอ้ายคึดว่ารสชาติมันกะคล้ายๆกับกินตำบักหุ่งกับกุ้งแช่น้ำปลานั่นล่ะ


มีอีหยังแน่ที่เฮาต้องจัดหามาในมื้อนี้

บักหุ่ง
บักถั่วผักยาว
บักเขือขื่น
บักกอก
บักพริกดิบ
บักพริกแห้ง
บักเขือเครือ
บักนาว
บักขามเปียก
กระเทียม
หอมเป
ผักกะเฉดหน่วยแก่ๆ
ขนมเส้น
กุ้งสด
โซดา
เกลือ
น้ำตาล
น้ำปลา
แล้วกะ ปลาร้า










วิธีเฮ็ดกะคือเฮาตำส้มตำปลาร้าทั่วไปเนาะครับ

เริ่มจากเอาบักหุ่งมาปลอกเปลือก แล้วเอาไปล้างพร้อมผักคุอย่าง

แล้งจั่งเอาบักหุ่งมาสับให้เป็นเส้นๆ เอาผักหอมเปมาหั่นเป็นตอนเอาไว้นำ

ผักกระเสดกะเอาแกะเอาแต่ในมันเอาให้พร้อมคือกัน







เอากุ้งมาแกะเอาเส้นเมาออก แล้วล้างแช่โซดาดับคาวเตรียมเอาไว้








บัดนี้กะมาตำบักพริก กระเทียมพอแหลก ใส่ถั่วฝักยาวตําพอแตก

ใส่เส้นบักหุ่งลงไปตามด้วย มะเขือเครือ  บักเขือขื่น ตำต่อพอเข้ากัน

ปรุงรสด้วย น้ำปลา น้ำปลาร้า น้ำตาลปี๊บ   เติมรสเปรี้ยวด้วยน้ำมะนาวกับน้ำมะขามเปียก









สุดท้ายเติม ขนมเส้น ผักหอมเป ผักกะเสดที่เฮากะในเอาไว้กับกุ้งสด คลุกให้เข้ากัน

ชิมรสตามเฮามัก เผ็ด เค็ม เปรี้ยว







ตักใส่ถาดแล้วค่อยยกมากินคู่กับผักสดต่างๆ






Create Date : 25 ตุลาคม 2559
Last Update : 30 ตุลาคม 2559 6:41:24 น.
Counter : 589 Pageviews.

0 comment
ตอนที่ 33 อาหารอีสาน เมนูที่ 30 ไส้กรอกอีสาน สูตร บักอ้าย 13-10-59











ตอนที่ 33

แนวกินอีสานบ้านเฮา 100 เมนู  เมนูที่  30

ไส้กรอกอีสาน สูตร บักอ้าย






วันเวลากะหมุนไปหมุนไป๊ แต่หน้าฝนกะยังบ่หมดไปจักเทื่อ บักอ้ายหัวแต่กลับมา

จากหนองบัว มาฮอดบางพลีฝนกะยังตกบ่หยุด ไผ๋ขับรถขับรากะระมัดระวังดีๆเด้อครับ

ขับรถใจเย็นๆเนาะถนนหนทางมันหมื่น


มาฮอดเมนูที่ สามสองตัวแล้ว เริ่มคึดบ่ออกว่าสิเฮ็ดแนวกินอีหยังมานำเสนอดี

พอดีผลพวงจากการมีไส้เค็มเหลืออยู่ในตู้เย็น บักอ้ายกะเลยคิดว่า

เอาเมนูไส้กรอกอีสานมาฝากมาต้อนพี่น้องกะคือสิดีอยู่

ไส้กรอกอีสานของบักอ้าย บ่แม่นไส้กรอกธรรมดาเด้

มันคือไส้กรอกอีสานไฮโซ เหอ ๆ ๆ

ไฮซ้อไฮโซจั่งได๋แม่นบ่ ไฮโซตรงที่มันมีแต่เนื้อหมูล้วนๆนี่ล่ะ

ไปกินหม๋องได๋เค้ากะบ่ใส่เนื้อหมูหลายแบบบักอ้ายแม้

กะเลยอยากเป็นคนอีสานฉบับไฮโซกับเขานำแน่

ประมาณว่าสิได้เป็นข่าวพาดหัวนำเขาแน่จักเทื่อในชีวิต

“บักอ้ายไฮโซหนุ่มย่องขึ้นคอนโดกับอ้ายเวียร์พะนะ”



พอๆ เว้าเล่นไปเรื่อย มาเบิ่งส่วนผสมไส้กรอกกันดีกว่า

แน่นอนเนื้อหมู ประมาณแปดส่วน
มันหมู หนึ่งส่วน
หนังหมู อีกส่วนหนึ่ง
กระเทียมขีดหนึ่งต่อหมูโลหนึ่ง
เกลือ
น้ำตาลทราย
ซีอิ๊วขาว
พริกไทยป่น
ข้าวสวยเย็น ทัพพีหนึ่ง
รากผักชี
แล้วกะ ไส้สำหรับยัด








ส่วนวิธีเฮ็ด กะเอาไส้เค็มไปล้างก่อน ล้างหลายๆรอบจนไส้หมดความเค็ม

ล้างแล้วกะเอาใส่ถ้วยเอาไว้





เอากระเทียมมาแกะเปลือกออก ล้างผักชีล้างแล้วเอามาหั่น

แล้วจั่งเอามันหมูมาบดพร้อมๆกับกระเทียมแล้วกะรากผักชี





บดแล้วกะเติมหมูสับลงไป เติมเครื่องปรุงทั้งหมด ยกเว้นข้าวสวยเย็น

คั้นหรือว่านวดให้มันเข้ากัน เอาข้าวสวยใส่ นวดอีกเทื่อ

บัดทีนี้กะเอาไปยัดลงไปในไส้








แล้วจั่งเอาเชือกมามัดเป็นข้อๆ สังเกตว่าข้อไส้กรอกบักอ้ายสิบ่ท่อกันเด้

คันมันปล้องท่อกันหมด มันสิงามเกิ้น บ่กล้ากินอีก

มัดเรียบร้อย เอาไปพึ่งลมจัก 4-5 ชั่วโมง






แค่นี้กะสามารถเอามาย่างหรือทอดกินได้แล้ว



แต่ถ้าหากมักส้มๆคือบักอ้ายกะท่าอีกจักมื้อ สองมื้อ เอาไปใส่ตู้เย็นเอาไว้ก่อน

ท่าให้มันส้ม ท่าดุๆ อีส้มนี้ ท่ามาหลายตอนแล้วเด้อ(เข้าใจมุกบ่)

เหอะๆ บ่ต้องแปลกใจดอก บักอ้ายมุกแป๊กแม้



ทอดหรือย่างแล้วกะจัดลงจาน กินพร้อมผักสด

แบบนี้ล่ะ

เอ้า กินได้เลย ไส้กรอกไฮโซของคนโลโซจั่งบักอ้าย







Create Date : 13 ตุลาคม 2559
Last Update : 30 ตุลาคม 2559 6:40:23 น.
Counter : 376 Pageviews.

0 comment
ตอนที่ 32 อาหารอีสาน เมนูที่ 29 ปลาร้าบอง 10-10-59












ตอนที่ 32

แนวกินอีสานบ้านเฮา 100 เมนู  เมนูที่  29

ปลาร้าบอง







สืบเนื่องมาจากตอนที่แล้ว ที่บักอ้ายได้เปิดไหปลาร้าปลานิลของบักอ้าย

กะเลยคึดว่าสิเอาปลาร้าปลานิลมาเฮ็ดอีหยังกินดีน้อ

นอกจากเอามาทอดกิน สุดท้ายกะเลยมาลงตัวที่ ปลาร้าบอง พอดิบพอดี

หากผู้ได๋ อยากเห็นวิธีเฮ็ดปลาร้าปลานิลกะสามารถเข้าไปอ่านจาก

ตอนที่ 31 ตอนที่แล้วได้เลยเด้อครับ บักอ้ายถือคติเฮ็ดเองมันสะอาดกว่า

ฮั่งเห็นข่าวซากงูในปลาร้าแล้ว ฮั่งย่านแม้

//www.bloggang.com/viewblog.php?id=boylovestory&date=07-10-2016&group=18&gblog=32





แต่ว่าตอนที่ 3 บักอ้ายเคยเขียนเมนู แจ่วบองของแท้เอาไว้แล้ว พอมาตอนนี้สิเขียน

ปลาร้าบองอีก มันสิบ่ซ้ำกันติ ตอบโลด บ่ซ้ำกันดอก เพราะว่าสูตรแจ่วบองกับสูตร

ปลาร้าบองของบักอ้ายมันคนละสูตรกัน แจ่วบองสิเน้นไปทางเครื่องรสชาติเผ็ดกว่าหลาย

แต่ปลาร้าบองสิเน้นเนื้อปลาร้าที่นุ่มฟู  เลือกเอาปลาร้าปลานิลหรือที่เอิ้นว่าปลาร้าหอม

คันลองเฮ็ดเบิ่งสิฮู้ว่ามันต่างกันโดยชิ้นเชิงเด้  




ส่วนประกอบทั้งหมดในการเฮ็ดปลาร้าบองกะมี
ปลาร้าปลานิลเฮ็ดเอง
กระเทียมปอกเปลือก
ข่าป่า
หอมแดงปอกเปลือก
พริกแห้งตราจินดา
น้ำตาลทราย
น้ำตาลบักพร้าว
ใบบักกูด
น้ำบักขามเปียก
ผิวบักกูด
(วัตถุดิบคุอย่าง บักอ้ายเลือกอย่างดี เลือกแล้วเลือกอีก
เพราะว่าเฮ็ดให้คะเจ้ากินนำ กะเลยต้องเลือกใช้แต่ของดีๆเนาะ
  ให้สด สะอาด แล้วกะปลอดภัย)









ส่วนวิธีเฮ็ด

อย่างแรกกะคั้นน้ำบักขามเปียกก่อน แล้วเอาไปตั้งไฟให้เป็นเนื้อเดียวกัน

จนได้เนื้อบักขามเปียกเข้มข้น แกะกระเทียมกับปอกหัวหอมและกะหั่น

เตรียมเอาไว้ ต่อมากะเอาข่าไปล้าง แล้วกะเอามาหั่นเตรียมไว้คือกัน

เรียบร้อยแล้ว เอาปลาร้าปลานิลของเฮาไปล้างให้ความเค็มมันออกจนหมด

ล้างจนสะอาดกะเอาไปนึ่งให้เนื้อมันสุก พอเนื้อมันสุกแล้วมันสิแกะง่ายขึ้น  

เวลาแกะใช่บ่วงขูดๆเอาแต่เนื้อ ส่วนก้างเอาทิ่มไป บ่ต้องเสียดาย

เอาพริกแห้ง กระเทียม  หอมแดง กับ ผิวบักกูดไปคั่วให้หอม

เอาทุกอย่างมาตำ แล้วตักขึ้นพักไว้














หลังจากได้เนื้อปลาร้าปลานิลบ่มีก้างมาแล้ว เอามาหั่นให้เป็นต่อนน้อยๆ  

แล้วจั่งเอามาตำคือกัน ตำจนเนื้อปลาขึ้นฟูโลดเด้อ






ตำแล้วหน้าตากะแบบซั่งซี้ล่ะ








เอาเครื่องคุอย่างใส่ลงไปในอ่างผสมให้เข้ากัน เติมเครื่องปรุง

แค่น้ำตาลบักพร้าว น้ำตาลทราย แล้วกะน้ำบักขามเปียก นวดให้เข้ากัน

บักอ้ายใช้เวลานวดเป็นชั่วโมง ย่อนเฮ็ดตั้งกิโลหนึ่ง

สุดท้ายเอาใบบักกูดมาซอยแล้วโฮยตามลงไป เฮากะสิได้ปลาร้าบอง

ที่เนื้อปลาฟูนุ่มลิ้น แถมยังหอมเครื่องเทศคักแน่











แค่นี้กะตักใส่โหลแก้วได้แล้วล่ะ

(ก่อนตักใส่เอาโหลไปล้างให้สะอาด แล้วเอามานึ่งฆ่าเชื้อโรคก่อนเด้อ)

บรรจุลงโหลแล้วกะเอาใส่ตู้เย็นเก็บได้เป็นเดือนอยู่เด้









คันมักหอมกว่าเก่ากะเอาไปผัดกะได้ มันกะสิหอมขึ้นกว่าเก่าอีก แต่ซั่มนี้กะกินได้แล้ว

ถือว่าสุกแล้วคือกัน เพราะทีแรกบักอ้ายเอาปลาร้าปลานิลไปนึ่งจนสุกแล้ว








ไผ๋อยากกินกะลองเฮ็ดเบิ่งเด้อครับ

แถวให้เอาห่อใบตองย่างไฟกะเพิ่มความแซ่บให้ปลาร้าบองได้คือกันเนาะครั













Create Date : 10 ตุลาคม 2559
Last Update : 1 พฤศจิกายน 2559 11:07:35 น.
Counter : 550 Pageviews.

0 comment
ตอนที่ 31 อาหารอีสาน เมนูที่ 28 ปลาร้าหอม 7-10-59












ตอนที่ 31

แนวกินอีสานบ้านเฮา 100 เมนู  เมนูที่  28

ปลาร้าหอม








ปลาร้า คือ แนวกินหมักที่ได้จากการนำเอาปลาสดมาหมักกับเกลือ

และกะข้าวคั่วในอัตราส่วนที่เหมาะสมกัน ก่อนสิหมักในภาชนะทิ่มเอาไว้

ตามระยะเวลาของปลาร้าแต่ละอย่าง จนได้เนื้อปลาสีน้ำตาลแล้วกะมีรสเค็ม

และกลมกล่อมจากเนื้อปลา



ส่วนปลาร้าหอม ที่อ้ายสิเฮ็ดในมื้อนี้ เป็นปลาร้าปลานิล วิธีการกะคล้ายๆกัน

กับปลาร้าทั่วๆไป เพียงแต่ใช้เวลาหมักแค่ประมาณ 15 วัน กะสามารถเอามาทอดกินได้เลย



ปลาร้า หรือคนอีสานบ้านเฮาเอิ้นว่า ปลา- จัดเป็นอาหารท้องถิ่นที่เก่าก่อน

ผลิตกันส่วนใหญ่ในอีสาน แต่ว่าปัจจุบัน ปลาร้ากลายเป็นแนวกินที่นิยมรับประทาน

หล๊ายหลายของคนไทยในทุกภาค โดยเฉพาะเอามาใช้เป็นส่วนผสมสำคัญของส้มตำ

หรือตำบักหุ่ง




ปลาร้า เป็นคำภาษากลาง มาจากคำว่า “ปลา”หมายถึงปลาชนิดต่างๆ ส่วนคำว่า “ร้า”

กะหมายถึง อ่อนนิ่ม (มาจากที่ปลาหมักแล้วสิมีลำตัวอ่อนนิ่ม)


ปลาแดxก เป็นคำท้องถิ่นของคนอีสานที่มาจากคำว่า “แดxก” แปลว่า การยัดใส่ในไห

ให้แน่นเพื่อให้ได้ปริมาณหลายที่สุด  นอกจากนั้น ยังอาจเหมือนถึงการกิน

ที่คนอีสานเอิ้นว่า แดxก กะได้คือกัน



ส่วนชนิดของปลากะแล้วแต่ประเภทของปลาร้าเนาะครับ เพราะปลาร้ากะมีหลายแบบคือกัน

บ่ว่าสิเป็น ปลาร้าโหน่ง ปลาร้านัว หรือว่าปลาร้าหอมที่เฮาที่เอ็ดกันในมื้อนี้



ส่วนปลาร้าหอมของบักอ้ายในมื้อนี้ บักอ้ายขอใช้ ปลานิล เพราะปลานิลเนื้อมันหลาย

ทอดแล้วรสชาติดี ถ้าถามว่าปลาร้าหอมคืออีหยัง  บักอ้ายกะสิตอบว่าปลาร้าหอมหมายถึง

ปลาร้าที่มีกลิ่นหอม น้ำปลาร้ามีสีน้ำตาล เนื้อปลาอาจเป็นสีเหลืองหรือสีแดงกะได้

แล้วแต่ว่าเฮาใช้ปลาอีหยังเฮ็ด แล้วกะใช้เวลาหมักโดนแค่ได๋

ปลาร้าหอมใช้เวลาหมักน้อยที่สุดในบรรดาปลาร้าทั้งหมด

เว้าให้เข้าใจง่ายๆ กะคือ ปลาร้าที่เฮาเอามาทอดกิน บ่ได้เอาไปใส่ส้มตำนั่นล่ะครับ


(ขอบคุณข้อมูลประกอบที่พอสิหาได้จากอินเตอร์เนต)





มาครับ บักอ้ายสิสาธิตวิธีทำ วิธีสร้างปลาร้าหอมให้เบิ่ง

ส่วนผสม
ปลานิลสด 3 ตัว เลือกประมาณ 3 ตัวต่อ 1 กิโลเด้อครับ
เกลือ 3 ขีด ขีดละตัว
ข้าวเหนียวดิบ ครึ่ง กิโล
ใบมะกรูด 6 ใบ






ขั้นตอนการทำปลาร้าหอมของบักอ้าย

เอาปลานิลมาล้างน้ำ ล้างหลายๆน้ำจนสะอาด แล้วขอดเกล็ดด้วยช้อนให้หมด

ควักไส้ออก ใช้กรรไกรตัดครีบ เงี่ยงออก ตักแก้มปลาออกพร้อม

แล้วค่อยล้างน้ำให้มันสะอาดอีกครั้ง เอาปลาที่ล้างแล้วใส่ถาด พร้อมเติมเกลือ

หมักทิ่มเอาไว้ค้างคืนจนน้ำคาวปลาออก







พอเช้ามื้อใหม่ เฮากะเอาข้าวมาคั่วข้าวรอ คั่วใส่ใบมะกรูด

เพิ่มความหอม คั่วเสร็จกะตำให้ละเอียด









ล้างปลาเอามาลงใส่ลงไปในกล่องที่จะใช้หมัก ใส่เกลือลงไป

คลุกให้เข้าเนื้อปลา หมักทิ่มไว้ใหม่เพิ่มอีก 3 ชั่วโมง










พอครบเวลานำเอาข้าวคั่วเทใส่กล่องหมัก คลุกให้เข้ากัน

แล้วใช้ข้าวคั่วที่เหลือห่อตัวปลาเอาไว้ เพื่อเพิ่มความหอมให้ปลาร้า







สุดท้ายปิดฝา และซีนหลายๆชั้นเพื่อความสะอาด บักอ้ายเอาถุงพลาสติกมาห่อ

ก่อนรอบหนึ่ง แล้วเอาเทปกาวมาปิด ก่อนสิเอาถุงดำมาใส่กันแสง แล้วปิดทับด้วย

เทปกาวอีกครั้งหนึ่ง รับรองบ่มีเชื้อโรคหรือว่าแมลงวันเข้าไปได้โดยเด็ดขาด

หลังจากนั้นกะทิ่มปลาร้าหมักเอาไว้ในอุณหภูมิปกติ

ขั้นต่ำ 15 วัน หรือหลายกว่านั้นกะได้ตามใจ









วันเวลาผ่านไป กะแกะปลาร้าออกมาทอด (แกะยากๆ ย่อนห่อดีเกิ้น555)
ตั้งกระทะให้ร้อน แล้วทอดไฟอ่อนๆ จนปลาร้าสุก
แล้วๆโรยกระเทียมเจียว









หน้าตาปลาร้าหอมกะออกมาประมาณนี้ล่ะครับ
หน้าตาดีป่านคนเฮ็ดอะโลด





Create Date : 07 ตุลาคม 2559
Last Update : 30 ตุลาคม 2559 6:38:52 น.
Counter : 511 Pageviews.

0 comment
1  2  3  4  5  6  7  8  9  10  11  12  13  14  15  16  17  18  19  20  

BlogGang Popular Award#13



บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทานมังสวิรัติถึงแม้มันจะเป็นเรื่องยาก
ถ้าหากเราตั้งใจ ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ