All Blog
ตอนที่ 28 อาหารอีสาน เมนูที่ 25 น้ำพริกปลาร้าใส่แมงดา 3-10-59










ตอนที่ 28

แนวกินอีสานบ้านเฮา 100 เมนู  เมนูที่  25



น้ำพริกปลาร้าแมงดา







มีคนเคยถามบักอ้ายหลายเทื่อว่าเป็นหยังคือจั่งเฮ็ดแนวกินเป็น บักอ้ายคึดว่าคงเป็น

เพราะว่าบักอ้ายใหญ่มาท่ามกลางแม่ย่าแม่ญิง  บักอ้ายมีเอื้อยสองคน

บักอ้ายเป็นลูกชายหล้า ส่วนลูกสาวของน้าเถียนกะเป็นแม่ญิงทั้งสามคน

บักอายกะเลยมีแต่หมู่แม่ญิง ตอนเป็นเด็กน้อยกะเล่นแต่ขายของ

หรือบ่กะเล่นเป็นพระธิดาแม้ เอาผ้าขาวม้ามานุ่งเป็นผ้าสไบ เว้าแล้วกะอยากหัวเจ้าของ

อีกอย่างบักอ้ายติดอีแม่หล๊ายหลาย เวลาอีแม่อยู่ในครัวบักอ้ายกะอยู่นำตลอด

บักอ้ายกะเลยครูพักลักจำการเฮ็ดแนวกินมาจากอีแม่

พอใหญ่มากะเลยกลายเป็นบักอ้ายแบบในคุมื้อนี้ล่ะ



เว้าพื้นน้ำพริก หรือ แจ่ว มันกะเป็นแนวกินคู่บ้านคู่เมืองของคนไทยเฮาเนาะ

จากที่เห็นว่ามีน้ำพริกหลายอย่างหลายแนวเต็มไปหมด ส่วนตัวบักอ้ายเอง

กะเคยเขียนไปแล้วถึงสามเทื่อ แจ่วบักพริกดิบ ป่นกุ้ง แล้วกะยังมีน้ำพริกเห็ด

สำหรับมื้อนี้ บักอ้ายกะยินดีที่สิเอาน้ำพริกถ้วยที่สี่มานำเสนอ

นั่นกะคือน้ำพริกปลาร้าแมงดา



เว้าฮอดแมงดา อ้ายกะคึดไปฮอดสมัยที่ยังเป็นเด็กน้อย บ้านอ้ายยังบ่มีไฟฟ้าเด้

ไฟฟ้าเข้าบ่ฮอด อีพ่อเลากะสิใช้แบตตารี่รถนี่ล่ะ มาต่อเข้ากับหลอดไฟสีม่วงๆ

เอาเสาไม้ไผ่มาตั้งหลอดไฟขึ้นสูงๆ พวกแมงดากะสิบินมาทุ่งนา มาตอมหลอดไฟ

หลายคักหลายแน่ อ้ายเป็นเด็กน้อยกะแล่นเก็บแมงดามาใส่ในกะละมังที่ฮองน้ำเอาไว้แล้ว

ม่วนคักอีหลี บางคืนได้ตั้งหลายร้อยโต ที่เว้านี่กะบ่แม่นอีหยังดอก

เมื่อเช้าไปตลาดไปซื้อเนื้องัวมาเฮ็ดส้มงัวให้เพิ้น เพิ้นสั่งเอาโลหนึ่ง

พอซื้อเนื้องัวแล้วกะแนมไปเห็นแมงดา กะเคยคึดอยากกินป่นปลาทูใส่แมงดา

ปรากฏว่าแมงดาโตละ 20 บาท ป้าด!!! อีพ่ออีแม่ข่อยเอ้ย มันคือแพงคักแท้น้อ  

แต่กะยอมซื้อมาโตหนึ่ง ย่อนว่าอยากกินหลาย


มาๆเข้าครัวตำน้ำพริกปลาร้าใส่แมงดานำกัน

เอาพาถาดมาใส่เครื่องมันก่อนเด้ มีบักพริกดิบ บักพริกชี้ฟ้าหน่วยใหญ่ๆสีแดง

กระเทียม หอมแดง บักนาว แมงดาตัวหนึ่งที่ซื้อมาจากตลาดนั่นล่ะ แล้วกะปลาทู

ส่วนเครื่องปรุงกะมี น้ำปลา น้ำตาล เกลือ กับปลาร้า ขาดบ่ได้กะคือ

ผัก เนาะครับเนาะ กินน้ำพริกกะต้องมีผัก บักอ้ายเลือกเอา บักบวบ

บักเขือ บักแตงร้าน ต้นหอม ผักชี แล้วกะใบหอมเป












ส่วนวิธีเฮ็ดกะคล้ายๆกับที่เคยนำเสนอมา

ปอกหอมแดง หั่นเอาไว้ แล้วเอาไปคั่วให้มันหอม พร้อมทั้ง

กระเทียมกับบักพริกดิบนำ ส่วนบักพริกแดงหน่วยใหญ่กะเอาไปคั่วหรือเผา

พร้อมๆกับแมงดาของเฮา คั่วแล้วกะเอาพริกแดงมาล้างน้ำเอาเปลือกออกแบบนี้เด้อ

เอาปลาทูไปต้มกับน้ำปลาร้า ต้มแล้วกะแยกกันไว้ เอาปลาทูมาแกะเอาแต่เนื้อเตรียมไว้

หั่นบักนาวกับผักชีกับหอมเปเตรียมไว้พร้อม




















แล้วกะได้เวลาตำ เอาบักพริก กระเทียม หอมแดงที่คั่วแล้วใส่ลงไปในครก

ใส่เกลือจักหน่อย ตำให้มันแหลก ค่อยใส่พริกแดงหน่วยใหญ่ ตำต่อให้แหลกอีกเทื่อ

เอาแมงดาลงไปตำ ตำแฮงๆอย่าให้เหลือซาก มันจะตำปากเวลากิน แหลกแล้วกะ

เอาปลาทูใส่ ตำๆๆ แหลกแล้วปรุงรสใส่น้ำปลา น้ำตาล แล้วกะน้ำปลาร้าที่เฮาต้มกับปลาทู

ใส่บักนาว ค้นให้เข้ากัน เติมผักชีกับหอมเปซอย ตักใส่ถ้วย แล้วเรื่องครับผม







ส่วนผักกะเอาบักบวบมาหั่นกับบักเขือไปต้ม ต้มสุกกะเอามาจัดลงจาน

เสริฟพร้อมน้ำพริกของเฮาโลด หิวแล้วล่ะ  ไปๆ กินข้าวแลงนำกัน พ่อแม่พี่น้อง















Create Date : 03 ตุลาคม 2559
Last Update : 30 ตุลาคม 2559 6:35:43 น.
Counter : 504 Pageviews.

1 comments
  
ท่าทางจะแซ่บหลายแท้เด้
โดย: ทนายอ้วน วันที่: 5 ตุลาคม 2559 เวลา:6:55:46 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ