All Blog
ตอนที่ 51 อาหารอีสาน เมนูที่ 40 หอย 3 แซ่บ 20-11-59




ตอนที่ 51 อาหารอีสาน

เมนูที่ 40  หอย 3 แซ่บ










เว้าพื้นเรื่องหอยหอย ที่แซ่บและถึกปากที่สุด

กะคงหนีบ่พ้น หอยแครง กับ หอยนางรม เนาะ

มื้อนี้ บักอ้ายกะเลยสิเอาเมนู หอย 3 อย่าง มาฝาก เคยเห็นผ่านๆในเพจๆหนึ่ง

เลยคึดว่าคงสิมีหลายๆคนที่มักและถึกใจ พอลองเฮ็ดกินแล้ว

ป้าด!!! มันแม่นอีหลีเด้พ่อแม่พี่น้องเอ้ย บักอ้ายขอถือโอกาสเอามานำเสนอ

(ขออนุญาติเอามาเสนอเป็นแนวกินคนอีสานบ้านเฮาเนาะครับ

เพราะว่าเป็นมันตำตำ คือตำบักหุ่ง  แถมยังใส่บักเขือขื่นนำพร้อม)



รับรองว่าผู้แส่ผู้สาวเห็นแล้วต้องน้ำลายแตก อยากชิมขึ้นมาโลด

บักอ้ายขอให้ชื่อ เมนูว่า    “หอย 3 แซ่บ”  

สิแซ่บ ถึกอกถึงใจปานได๋ กะตามมาเบิ่งเอาโลด



เริ่มจากส่วนผสมของเมนูทั้งหมดประกอบด้วย

หอยแครง เลือกเอาหน่วยใหญ่แน่ ครึ่งกิโล
หอยนางรม 1 กระปุก แบบที่เพิ้นขาย สามปุกร้อยนั่นล่ะ
หอยดอง ประมาณ ¾ ถ้วยตวง เอาน้ำหอยดองพร้อมตัวมัน
บักพริกแดง กับ บักพริกเขียว อย่างละ 6 หน่วย
บักนาว 3 หน่วย
บักเขือขื่น หรือว่า บักเขือเหลือง 2 หน่วย
กระเทียมจีน 5 กลีบ
บักเขือเทศราชินี 5 หน่วย
ใบสะระแหน่
น้ำตาลบักพร้าว 1 ช้อนโต๊ะ
น้ำปลา 1 ช้อนโต๊ะ
น้ำบักขามเปียก 1 ช้อนโต๊ะ
ผงชูรส ครึ่งช้อนโต๊ะ













วิธีเฮ็ด

เอาหอยแครงไปล้าง ขัดให้เปลือกให้มันสะอาด เพราะว่าเฮาเอาใส่ทั้งเปลือก






พอล้างสะอาดแล้ว กะเอาไปลวก 2 นาทีพอ ลวกในน้ำเดือดจัดๆเด้อ






คันลวกโดน หอยสิบ่ติดเปลือก ลวกแล้วกะฟ้าวเอาไปน๊อคในน้ำแข็ง

แล้วจั่งเอามาแกะ เอาฝาหอยทิ่มฝาหนึ่ง เหลือเอาไว้ฝาหนึ่ง ตามรูป






ขั้นตอนต่อไป เอาบักเขือขื่นมาฝานเอาเปลือก หน่วยหนึ่งฝาน 3 ต่อนกะพอ

ให้มันพอติดในมันนำแน่จักหน่อย  เอาบักนาวมาใส่ บักเขือสิได้บ่ดำ พักเอาไว้ก่อน

เอาบักนาวมาฝาน 3 ต่อนแบบเดียวกัน

ส่วนบักเขือเทศ เอามาผ่าครึ่ง

ใบสะระแหน่ เอามาเด็ดเป็นใบๆ






เอากระเทียมกับบักพริกมาตำพอหยาบๆ

ใส่น้ำตาลบักพร้าวกับน้ำบักขามเปียกอย่างละช้อนโต๊ะหนึ่งพอ






ตามด้วยน้ำปลา ช้อนโต๊ะหนึ่งคือกัน ผงชูรสครึ่งช้อนโต๊ะ

คันฮักษาสุขภาพกะบ่ต้องใส่กะได้ บีบบักนาวตามลงไปซีกเดียวพอเด้อ

อย่าใส่หลายกว่านั้น มันสิส้มเกิ้น บ่แซ่บ






เอาบักเขือเทศกับบักเขือเหลืองใส่ คนให้เข้ากัน

เอาบักนาวที่เฮาฝานเอาไว้ใส่ลงไป

ตามด้วยใบสะระแหน่ บ่ต้องคนแล้ว พักเอาไว้ก่อน






จัดหอยแครงกับหอยนางรมลงไปในจาน





ตามด้วยหอยดองพร้อมน้ำหอยดองนำพร้อม





ตักเครื่องที่เฮาผสมไว้ลงไป แล้วค่อยใช้ช้อนคนให้เครื่องปรุงทั้งหมดมันเข้ากัน





จัดแต่งจานให้มันงามๆ  หน้าตากะออกมาแบบนี้









คันผู้ได๋มันส้มคักๆ กะให้บีบต่อนบักนาวในจานใส่

เมนูนี้นอกจากหน้าตาที่ดีแล้ว รสชาติยังจัดจ้านถึกอกถึกใจบักอ้ายขนาด


เอ้า!!! ลองเอาไปเฮ็ดเบิ่ง ติดใจขึ้นมากะอย่าลืมมาขอบอกขอบใจบักอ้ายเด้อครับ



Create Date : 20 พฤศจิกายน 2559
Last Update : 20 พฤศจิกายน 2559 20:47:48 น.
Counter : 2104 Pageviews.		  
1 comments
Share
  
ท่าทางจะแซ่บมากทีเดียว
โดย: ทนายอ้วน วันที่: 21 พฤศจิกายน 2559 เวลา:17:11:25 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 

บักอ้าย
Location :
  

[ดู Profile ทั้งหมด]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ