Group Blog All Blog
|
ตอนที่ 11 อาหารอีสาน เมนูที่ 11 แกงสุดที่รัก (แกงอ่อมบักหอยจูบ) วันที่ 4-9-59
ตอนที่ 11 แนวกินอีสานบ้านเฮา 100 เมนู เมนูที่ 11 แกงอ่อมบักหอยจูบ หรือว่า แกงสุดที่รัก เด้อครับ พ่อแม่พี่น้อง เสียงตีระฆังดัง เง๋งๆๆ บอกให้ฮู้ว่าเป็นเวลาโรงเรียนเลิก บักอ้ายฟ้าวคว้าจักรยานคู่ใจที่อีพ่อซื้อให้ เพราะว่าสอบได้ที่หนึ่ง(ขี้คุยแต่น้อยเนาะเจ้า)บักอ้ายปั่นออกจากโรงเรียนหลังจากเลิกแถว พอมาฮอดบ้านกะเฮ็นอีแม่ถือกะตร้าเตรียมพร้อมไว้แล้ว ส่วนอีพ่อกะเอาผ้าขาวม้ามามัดเอวเสียบอีโต้ลงไปทางหลังบอกว่าพร้อมแล้วคือกัน ไปเปลี่ยนเสื้อผ้าไวๆสิพาไปงมบักหอย (ขอขอบคุณรูปนี้จาก siamensis.oegเดอครับที่ให้นำมาประกอบความม่วน) พอมาถึงห้วยน้ำ เฮากะลงไปงมหอยจูบตามน้ำตื้นๆ อีแม่ยังบอกอีกว่า หอยขรัวกับหอยจูบ(หอมขม)มันบ่คือกัน บักหอยขวัญต้องเอาเสียมไปขุดเอาตามทุ่งนา ยามหน้าแล้ง เพราะมันจำศีลอยู่คือจั่งกบนี่ล่ะ ส่วนบักหอยจูบกะมางมเอาตามห้วยน้ำ ข้อแตกต่างอีกอย่างหนึ่งกะคือ หอยขรัวสิมีเนื้อหนากว่าหอยจูบ (ภาพบรรยากาศอีสานบ้านเฮางามๆเนาะ ขอบคุณเด้อจากเพจดังแดนดินถิ่นมาตุภูมิ) ที่เว้ามาทั้งหมดกะคือเหตุการณ์ที่ผ่านมาแล้วร่วมซาวปี บ่ต้องมาคำนวณอายุบักอ้ายดอกเด้อ บักอ้ายยังเป็นผู้บ่าวซำน้อยอยู่ อีแม่กะถามดู๋ๆว่าเป็นหยังเมิงจั่งบ่มีเมียจักเถื่อบักอ้าย อีแม่จ๋า บักอย่ายังฮักอิสระอยู่เด้ 555 คักเนาะ มื้อนี้วันนี้ เฮากะเดินทางมาพร้อมกันจนฮอดเมนูที่ 11 แล้วเนาะ สำหรับเมนูดีเมนูเด็ดมื้อนี้บักอ้ายขอนำเสนอ แกงอ่อมบักหอยจูบ หรือสิเอิ้นว่า แกงสุดที่รักกะสิเด้ มาแนมเบิ่งส่วนผสมนำกันก่อนว่ามีอีหยังแน่ บ่ยากๆ พระเอกมาโลดมีบักหอยจูบ (หอยขม) นางเอกของเฮาคือใบผักอีตู่ (แมงลัก)เพราะว่านางชื่ออีตู่นางเลยได้เป็นนางเอก เกลือ ข่า หัวคิงไค ข้าวเบือ(ข้าวสารแช่น้ำ) บักพริก กระเทียม ผักบั่ว(หอมแดง) ผักกะแยง น้ำปลา ปลาร้าปลากิเดิดอย่างดีเด้ ใบผักอีเลิศ(ใบชะพลู) ส่วนวิธีเฮ็ดกะบ่ต้องห่วง ขั้นตอนมีบ่หลาย ง่ายๆ แถมได้กิน แกงบักหอยสูตรอีสานต้อนตำหรับแท้ๆ ว่าแล้วกะมาย่าวๆกันโลด วิธีเฮ็ด อ่อมหอยจูบ มีดังต่อไปนี้ เลขที่ออก 00 บ่แม่นแล้วบักอ้าย อันนั้นมันออกเลขออกเบอร์ ตัวนี้คือสิซื้อเลขดุเนาะ มัวแต่เล่นยุ บ่แล้วจักเทื่อ วิธีเฮ็ดกะเริ่มจาก เอาหอยจูบมาแช่ไว้ให้มันคายขี้ดินออกมา เอาจั่งเอาหอยจูบมาตัดก้นให้มันสะอาด แล้วล้างน้ำอีกหลายๆเทื่อเด้อ ให้ขี้ดินมันหมด คันสั่นเวลากินแข่วหักบักอ้ายบ่อรับรองเด้ หั่นเครื่องแกงแล้วจั่งเอาบักพริก กระเทียม หัวผักบั่ว ข่า หัวคิงไค เกลือ มาตำรวมกันให้ละเอียด ข้าวเบือนำเด้อ อย่าลืม ตำเข้าไป ตำแฮงๆโลด ครกมันบ่แตกดอก พวกผักต่างๆ กะจัดการเตรียมเอาไว้ก่อน หลังจากล้างให้สะอาดแล้ว ผักอีตู่กะเอามาเด็ด ผักอีเลิศกับผักกะแยงกะเอามาหั่นเป็นท่อนๆไว้ท่า เอาเลยมะ พร้อมแล้วได้เลย เอามาเลยหัวใจฉันพันสูบ บักอ้ายบักฮ้องเพลงในครัว เพราะว่าอยากได้ผัวเฒ่า ค่อยๆเด้อ เดี๋ยวอีแม่ได้ยินเลาสิหัวใจวาย พร้อมแล้วเนาะ บัดทีนี้กะเอาหม้อใส่น้ำ ท่าให้น้ำมันเดือด แล้วเอาบักหอยใส่หม้อโลด ท่าในหม้อเดือดอีกเทื่อ ค่อยเอาเครื่องแกงของเฮาใส่ลงไป ผู้ลังคนเพิ้นกะเฮ็ดแบบเอาข่าสับ หัวคิงไคหั่นเป็นท่อน ๆ ใส่ลงในหม้อแต่ว่าบักอ้ายเอามาตำฮวมกันหมดโลด มันนัวกว่าแม้ แล้วแต่เด้อ สูตรใครก็ส่วนใครนะคะคู้ณ บัดที่นี่กะเอาข้าวเบือที่เฮาตำละเอียดแล้วใส่ลงในหม้อ คนให้มันเข้ากัน จนข้าวเบือสุก ถามว่าเป็นหยังจั่งต้องใส่ข้าวเบือ ที่ต้องใส่เพราะว่าอยากสิให้น้ำแกงมันเหนียวแล้วกะข้นขึ้นนั่นเอง ต่อไปกะใส่ผักอีตู่ ใบอีเลิศ ผักกะแยง คนก่อนเด้อ แล้วจั่งค่อยปรุงรสด้วยเกลือ น้ำปลาร้า น้ำปลา คันมักหวานกะใส่น้ำตาลจักหน่อยกะได้ ท่าให้เดือด แล้วยกหม้อลงตักใส่ถ้วย ได้เวลากะเอาข้าวเหนี่ยวฮ้อนๆมาจ้ำลงไป ป้าด!!หอมผักกะแยงคัก เมนูนี้บักอ้ายแนะนำให้หาหมอลำเพลงฮักจักเพลงมาเปิดตอนกิน ผู้ได๋มีผุบ่าวกะเอิ้นบุบ่าวมากินนำ ผุได๋มีผู้สาวกะเอิ้นผุสาวมากันนำ เพราะว่ามันต้องจูบกันสนั่นหวั่นไหว มื้อนี้บักอ้ายกะต้องโบกมือลาไป กับกลอนลำกลอนนี้ก่อน เอาไว้พ้อกันใหม่ ขอโตไปจูบกับแกงสุดที่รักก่อนเด้อ https://www.youtube.com/watch?v=3WUXjR7ntqE ตอนที่ 10 อาหารอีสาน เมนูที่ 10 ส้มผัก กับ ผัดไข่ใส่ส้มผัก วันที่ 1-9-59
ตอนที่ 10 แนวกินอีสานบ้านเฮา 100 เมนู เมนูที่ 10 ส้มผัก กับ ผัดไข่ใส่ส้มผัก ก่อนอื่นบักอ้ายต้องขอขอบคุณหลายๆที่ติดตามบักอ้ายมาจนถึงเมนูที่ 10 สายลมเย็นๆพัดลอดเข้ามาทางหน้าต่าง เห็นฟ้าสีแหล่ๆ ใบบักพร้าวข้างบ้านปลิวไสวโบกไปมา ปานว่าผู้สาวภูไทกำลังฟ้อนรำอยู่ บักอ้ายยังนอนขดอยู่ใต้ผ้าห่มนวมที่อีแม่ทอด้วยมือเลาเอง ยัดไส้บักนุ่นที่ปลูกเอาไว้เต็มข้างๆบ้าน อ้ายเอ้ย ลุกมาเฮ็ดส้มผักให้แม่แน่ สัปดาห์หน้าน้าเถียรสิมายาม สิได้แนวกินไปต้อนฮับเพิ้นเสียงอีแม่ฮ้องปลุก บักอ้ายงัวเงียลุกขึ้นมานั่ง และจั่งค่อยๆต้อดๆ(ขยับ)ไปทางครัว อีแม่เตรียม ผักกาดขาว ผักกะหล่ำ ผักบั่ว(ต้นหอมแดง)เอาไว้ในชามให้แล้ว ถัดมากะคือ เกลือ น้ำข้าวหม่า และกระติ๊บข้าวเหนียว ใส่ผักกาดขาวนำบ่อีแม่บักอ้ายถาม เพราะเห็นว่าคุเทื่อที่อีแม่เฮ็ดเลาที่ใส่แค่ใช้แค่ผักบั่วกับผักกะหล่ำ บ่ต้องใส่ผักบั่วหลายดอก ใส่ผักกะหล่ำหลายๆ ส่วนผักกาดขาวใส่ไปนำ น้าเถียนเลามักกินผัดส้มผักใส่ไข่ คันใส่ผักบั่วหลายมันผัดบ่แซบอีแม่อธิบาย บักอ้ายจั่งค่อยเอาผักทั้งหมดไปล้างน้ำ แล้วเอามาหั่นแยกเตรียมเอาไว้ บ่ต้องหย้อง(คั้น)ผักรวมกันเด้อ แยกกันหย้อง)บักอ้ายพยักหน้า เอาผักกะหล่ำมาใส่เกลือลงไป แล้วออกแรงคั้นจนน้ำพริกไหลออกมา ผักกะหล่ำเริ่มนิ่มบักอ้ายกะหันไปทำแบบเดียวกันกับผักกาดขาดแล้วกะผักบั่ว แล้วๆกะคั้นเอาน้ำผักเททิ้ง เอาผักที่คั้นแล้วไปล้างน้ำอีกเทื่อหนึ่ง แล้วจั่งเทผักทั้งสามอย่างรวมกันในชาม ใส่เกลือ ใส่ข้าวเหนียว คันมักหวานกะใส่น้ำตาลจักหน่อยกะได้ คั้นให้มันเข้ากัน เอากระปุกโดเรมอนล้างมาให้ข่อยแน่บักอ้ายหันไปบอกอีแม่ ถือชามส้มผักย่างออกมาจากในครัว อีแม่วางกระปุกที่ล้างเอาไว้แล้วไว้ บักอ้ายจั่งเอาส้มผักใส่เข้าไป กดให้มันแน่น แล้วจั่งเอาน้ำข้าวหม่าเทให้ท่วม กินหมดนี้ น้าเถียนขี้แตกพอดีเว้าติดตลกพร้อมหัวเราะ แล้วปิดฝากระปุกแล้วย่างเอากลับไปไว้ในครัว ห้ามื้อผ่านไป บ่ายคล้อยของวันเสาร์น้าเถียนกะขับรถกะบะเข้ามาจอดข้างบ้าน เสียงเซ็งแซดกะดังขึ้น น้ำเถียนเป็นน้องสาวหล้าของอีแม่ น้าเถียนมาพร้อมกับน้าทองผัวเลา แล้วกะอีที กับอีเล่ ลูกสาวคนกลางกับลูกสาวหล้า บักอ้ายไปไสล่ะน้าเถียนถามขึ้น ผัดส้มผักใส่ไข่อยู่ในครัวพุ่นนะอีแม่ว่า เดี๋ยวข่อยเข้าไปเบิ่งให้เองอีทีฟ้าวแล่นเข้ามาในครัว ยื่นหน้าแหลมๆเข้ามาใกล้บักอ้าย หวัดดีอ้าย หวัดดีบักอ้ายตอบ พร้อมหยิบไข่ไก่ออกมา สอนข่อยแน่ มื้อหน้าสิได้เอาไปผัดให้อีแม่กินคนมาใหม่เฮ็ดท่าทางสนใจ เอาอีหลีบ่คนฟังพยักหน้า เบิ่งเด้อ มีส้มผัก ไข่ กระเทียม น้ำปลา น้ำตาล ซีอิ้วขาว บักอ้ายชี้มือให้อีทีเบิ่งแต่ละอย่าง ทุบกระเทียมให้แน่อีทีคว้ากระเทียมไปทุบด้วยสันมีด เอ็ดบ่ยากดอก ตั้งน้ำมันให้กระทะมันฮ้อนก่อน เอากระเทียมใส่ลงไป ผัดให้มันพอหอม ตอกไข่ลงไปแบบนี้ว่าแล้วกะตอกไข่ลงไปในกระทะ เสียงไฟดังซ่าๆ พร้อมๆกับกลิ่นที่หอมไปทั้งครัว ท่าให้ไข่สุก แล้วกะเคี่ยเบาๆ จั่งเอาส้มผักใส่ คันบ่มักส้มหลายกะเอาไปล้างน้ำก่อน แต่น้าเถียนเลามักส้มๆ อ้ายกะเลยบ่ได้ล้างอีทีช่อยเทส้มผักลงไปในกระทะ ทีนี้กะปรุงรสโลด ใส่น้ำตาล น้ำปลา ซีอิ๊วขาว ผัดให้มัดข้าวกัน แล้วกะตักใส่จาน หอมแท้อ้ายอีทียกจานขึ้นมาดม เคล็ดลับเด้อ ผัดให้มันแห้งๆมันจั่งสิแซบ ไป๋ๆช่อยกันยกออกไป พุ่นนะผู้ใหญ่เพิ้นตั้งวงกันแล้ว เสื่อสาดถูกเอาออกมาปูที่เดิ่นบ้าน กับข้าวกับปลากะถูกยกมาวาง ก่อนที่ผู้คนสิมาล้อมวงกินข้าวกัน ต่างคนกะต่างถามสารทุกข์สุขดิบกัน ทั้งวงพาข้าวจังมีแต่เสียงหัวเราะแล้วกะความสุข พร้อมๆกับดวงตะเว้นที่ลาลับขอบฟ้าลงไป ตอนที่ 9 อาหารอีสาน เมนูที่ 9 หมกหน่อไม้ใส่ปลาดุก 30-8-59
ตอนที่ 9 แนวกินอีสานบ้านเฮา 100 เมนู เมนูที่ 9 หมกหน่อไม้ใส่ปลาดุก ฝนตกหมดมื้อหมดเว้นเนาะ ตกป่านว่าสิบ่จ่งไว้ตกมื้ออื่นอีก ฝนตกจั่งซี่ หน่อไม้หน่อไหล่กะคือสิออกหลายอยู่ บักอ้ายเลยคึดฮอด หมกหน่อไม้ใส่ปลาดุก เอาเข้าเหนียวจ้ำ ป้าด!!! เว้าแล้วน้ำลายไหล ถึงสิเป็นเมนูที่เฮ็ดยากจักหน่อย แต่ว่าบักอ้ายกะภูมิใจนำเสนอ ให้เป็นเมนูอันดับที่ 9 นั่นกะคือ หมกหน่อไม้ใส่ปลาดุก ว่าแล้วกะไปจกหน่อไม้ลวกที่ดองเอาไว้ในไหออกมาโลด พอดีอีพ่อเราไปใส่ดางได้ปลาดุกมาโตหนึ่งพอดีแม้ เอ้า+++มาๆ มาล้อมวงเบิ่ง บักอ้ายเฮ็ด หมกหน่อไม้ใส่ปลาดุกเด้อ มาเบิ่งเครื่องปรุงก่อนเนาะ หน่อไม้ ใบยานาง เอามาคั้นกรองเอาแต่น้ำ ผักชีลาว บักบวบ เด็ดเอามาจากข้างฮั้วนั้นล่ะ เห็ดหูหนู ผักบั่ว ผักชีไทย ผักอีตู่ ปลาดุก น้ำปลาร้า น้ำปลา แล้วกะน้ำตาล บัดที่นี่กะมาเบิ่งเครื่องบักพริกแกง ข้าวสารเหนียวแช่น้ำกะเอาแล้วแต่มัก คันมักเหนียวๆกะใส่หลายๆ หัวคิ่งไค หัวข่า อ้ายใส่นำสิได้หอมๆ พริกแห้ง กับ พริกสดผสมกัน มั่นจั่งสิแซ่บ หัวกระชาย หัวบักบั่ว(หัวหอมแดง) กระเทียมไทย ใบมะกรูด แนมเบิ่งเครื่องกะหลายอยู่ แต่บ่ต้องย่านเด้ มีผักอีหยังขึ้นอยู่ริมฮั้ว อยากเก็บมาใส่กะได้คือกัน บ่มีสูตรตายโตดอก เข้าสู่วิธีเอ็ด มาลงมือนำกันโลด เอาปลาดุกมาหั่นเป็นแว่นๆ แล้วๆกะเอามาล้างกับเกลือเอาเมือกเหนียวๆมันออกให้หมด ล้างเกลือออกให้หมดความเค็ม บักอ้ายสิบอกเคล็ดลับขั้นเทพให้เด้อ รับรองว่าบ่มีกลิ่นความปลาหลงเหลืออย่างแน่นอน เอาน้ำส้มสายชู เทไปในถ้วยปลาดุก แช่ทิ่มเอาไป15นาที รับรองว่าปลาดุกมันหมดกลิ่นคาวร้อยเปอร์เซ็นต์โลด บัดที่นี่กะเอาหน่อไม้มา ใช้ส้อมขูดให้เป็นเส้นยาวๆแบบนี้ แล้วๆกะคั้นเอาน้ำหน่อไม้ออก มันสิจะบ่เฟี่ยน คั้นแล้วกะเอาไปล้างน้ำให้มันสะอาด เอาหน่อไม้เป็นเส้นๆมาคั้นกับน้ำใบยานาง อย่าลืมแบ่งน้ำใบยานางเอาไว้นำเด้อ คั้นในน้ำใบย่านางซึมเข้าไปในเส้นหน่อไม้ คันบ่คั้นมันสิบ่แซบเด้ เส้นหน่อไม้มันสิแข็ง จั่งเอาหน่อไม้ไปต้มใส่ใบย่านาง ต้มตั้ง10นาทีพอ แล้วเอามาล้างน้ำอีกรอบ แล้วบีบเอาน้ำออกให้เหลือแต่หน่อไม้ แล้วจั่งใส่น้ำยานางลงไปอีกเที่ยหนึ่ง คั้นให้มันเข้ากัน เอาบักบวบ เห็ดหูหนู ผักชีลาว ผักชีไทย ผักบั่ว ผักอีตู่มาหั่นเตรียมไว้ เอาบักพริกแห้ง บักพริกสด กระเทียม ผักบั่ว หัวคิงไค กระชาย ข่า มาหั่น แล้วจั่งตำให้มันละเอียด มาๆ เจ้านั่นล่ะ มาตำให้ข่อยแน่ บักอ้ายเอิ้นผู้บ่าวที่ยืนเบิ่งอยู่ มาช่อยตำ เห็นเรากล้ามใหญ่คัก คือสิตำแหลกเร็ว ตำแล้วกะตำข้าวเบือให้นำแน่เด้อ เอาให้มันป่นๆโลด เดี๋ยวบักอ้ายสิไปตัดใบตองหลังบ้านก่อน หลังจากเลือกได้ใบตองใบใหญ่ๆ กะเลาะเอาก้านออก แล้วเอาไปขางไฟสิมันอ่อนก่อน เวลาห่อ มันจังสิบ่แตกออกมา หลังจากนั้นกะเติม ผักต่างๆที่เฮาหั่นเตรียมเอาไว้ลงไป คั้นให้มันเข้ากันอีกจักหน่อย ใส่ข้าวเบียแล้วคั้น ใส่หมากพริกแกงแล้วคั้น ใส่เครื่องปรุงก่อนเด้อ เติมน้ำปลาร้า น้ำปลา แล้วกะน้ำตาลจักหน่อย ลองเอามื้อจุ่มมาแตะตรงลิ้นจักหน่อย สิได้ฮู้ว่าแซบไป๋ ชิมเบิ่งอย่าให้จืดหลาย เพราะเวลานึ่งน้ำมันสิไหลออก ให้มันเค็มๆแน่ พอนึ่งสุกรสชาติกะสิพอดิบพอดี เตรียมใบตองห่อ เอามาฉีก แล้วกะเช็ดให้มันสะอาด ตักหน่อไม้ใส่ใบตอง เอาหมากพริก ต้นหอม วางให้มันงามๆ อย่าใส่หลายเด้อ ใบตองมันสิแตก แล้วจั่งห่อ ห่อแล้วกะกลัด บักอ้ายเอาไม้จิ้มแข่วอีพ่อมากลัดใบตอง มันแหลมดี ไปลักเอา เดี๋ยวเราจะจ่มให้ เราแพงคัก ไม้จิ่มแข่ว ลูกสาวซื้อมาฝากจากกรุงเทพ คันมักม่วนกะเอิ้นหมู่หรือผู้บ่าวมาช่อยกันห่อหลายๆคน ห่อไป จีบกันไป ป้าดโธ่ แจ่แม่นคักเนาะ ห่อจนหมด กะสิได้ หมกหน่อไม้แบบนี้ล่ะ แล้วๆกะเอาใบตองฮองก้นหม้อ เอาไปนึ่ง ให้เวลาประมาณ 25 นาที กะได้เวลาแซ่บแล้ว เอ้ายกกล่องเข้ามา กินเข้ากันเด้อ กินเข้ากับหมกหน่อไม้ใส่ปลาดุก อย่าลืมแบ่งให้แม่ใหญ่ทาข้างบ้านจักหมกแน่เด้ออ้าย เสียงอีแม่บอก เดี๋ยวบักอ้ายเอาหมกหน่อไม้ไปแจกเพื่อนบ้านก่อนเด้อ เอาไว้พบกันใหม่ ตอนที่ 10 เด้อครับเด้อ สวัสดีครับ ตอนที่ 8 อาหารอีสาน เมนูที่ 8 ปลาส้มบ่มีก้าง แซ๊บแซบ 30-8-59
ตอนที่ 8 |
บักอ้าย
Rss Feed Smember ผู้ติดตามบล็อก : 23 คน [?] ทำอาหารทานเองไม่ใช่เรื่องยาก ผมทำได้ คุณก็ทำได้ ผมอยากเป็นแรงบันดาลใจให้คุณ เชพฆฤณ Friends Blog Link |