All Blog
ตอนที่ 25 อาหารอีสาน เมนูที่ 23 น้ำตกหมู 29-9-59












ตอนที่ 25

แนวกินอีสานบ้านเฮา 100 เมนู  เมนูที่  23


น้ำตกหมู








เว้าพื้นแนวกินอีสานบ้านเฮากะมีหลายสิ่งหลายอย่าง ล้วนแล้วแต่รสชาติจัดจ้านทั้งนั้น

มื้อนี้อ้ายเลยสิขอนำเสนอ “น้ำตกหมู”

เมนูธรรมด๊าธรรมดา แต่รสชาติถึกอกถึงใจไผ๋อีกหลายๆคน


แม่ใหญ่นวลเลาเว้าให้อ้ายฟังว่า ตั้งแต่เลาแล่นนำอีพ่อ จนมีลูกสาวชื่อเอื้อนคำพัน

ออกมาเป็นพยานรัก  จั่งได้พากันกลับมาขอคะมาอีพ่ออีแม่ของเลา

จนได้ผูกข่อต่อแขนเป็นผัวเป็นเมียกันอย่างถูกต้อง เลากะได้เมนู

น้ำตกหมูนี่ล่ะมัดใจผัวเลามาตลอด พ่อใหญ่ชายเพิ้นยังมักกินจนคุมื้อนี้

โดยเฉพาะน้ำตกหมู ฝีมือ เมียฮักเมียแพงของเลา สมัยนั้นบ้านพักอีพ่ออีแม่

ของบักอ้ายในอำเภอสระแก้ว อยู่ใกล้โรงฆ่าหมู กะเลยเฮ็ดให้มีเนื้อหมูกินบ่อึดบ่ยาก

อีกทั้งอีพ่อเลากะเป็นทหารพรานมีเงินเดือนกิน ความเป็นอยู่ของผัวหนุ่มเมียสาว

ในตอนนั้นกะเลยซำบายป่านขึ้นสวรรค์


“บักห่าอ้ายเอ้ย บักลูกเวร เรื่องอีหยังเอาเรื่องของพ่อของแม่ไปเว้าพื้นให้ผู้อื่นฟัง

เซาท่าแม้ เซาเว้าเด้อ อย่าให้แม่ต้องสูน(สูนแปลว่าโกรธ)สูนขึ้นบ่คือสูนลงเด้บัดที่นี่

เว้าได้จั่งได๋ว่าแม่แล่นนำพ่อโต เอาเรื่องอีตั๋วไปเว้า มันบ่ดีฮู่บ่”

อีแม่เลาฮ้องขึ้นมาขัดบักอ้ายแล้ว

“ครับ เซาเว้ากะได้ แต่ว่าเรื่องทั้งหมดข่อยบ่ได้ขี้ตั๋วเด้”

บักอ้ายเถียง(เรื่องเถียงแม่เก่งคักแท้ดอก)

“โตฮู้ได้จั่งได๋ โตเกิดทันบ่”

เว้าไปสองไพเบี้ย นิ่งเสียตำลึงทอง

เฮามาฟ้าวแล่นหนีเข้าครัวไปนำกัน ให้มันไวๆ ขี้คร้านฟังแม่ใหญ่นวลเลาสวด

เข้ามาแล้ว บัดที่นี้กะมาแนมเบิ่งส่วนผสมของน้ำตกหมู

สูตรอีแม่บักอ้าย(คนมักจ่ม) ว่ามีส่วนผสมอีหยังแน่

แน่นอนพระเอกเมนูนี้กะคือเนื้อหมู ใช้เป็นหมูสันในกะได้ คันมักมันๆกะใช้สันคอ

ตามมากะคือ ต้นหอม ผักชี ผักหอมเป หอมแดง บักพริกแห้ง ข้าวเหนียว

ใบบักกูด น้ำมันหอย น้ำปลา น้ำตาล และกะบักนาว









มาลงมือเฮ็ดนำกันเนาะ บัดทีนี้

ฟ้าวเฮ็ดก่อนเด้อ สิได้ฟ้าวไปเบิ่งหนังเรื่อง “นาคี”ฉายมื้อวานตอนแรกกะม่วนๆ

เจ้าแม่นาคีกะผู้จบผู้งามหลาย ส่วนฝ่ายอ้ายเคน กะหล่อเป็นตาฮักคัก

ฟ้าวดั่งไฟก่อน






ระหว่างท่าให้ถ่านแดง กะเอาเนื้อหมูมาหมักกับน้ำมันหอย






พอถ่านไฟแดงกะเอามาย่าง ให้น้ำมันจากเนื้อหมูตกลงมาในเตาถ่าน

จนไฟลุกพรึ่บๆนั่นล่ะ จั่งสิเอิ้นว่า น้ำตก บ่แม่นน้ำตกสาลิกาเด้ เข้าใจบ่

ย่างพอให้สุกจัก70%พอ












จากนั้นกะเอาบักพริกมาคั่ว ข้าวเหนียวนำเอามาคั่วใส่ใบบักกูดคือเก่านั่นล่ะ มันจั่งหอม

คั่วจนๆได้ที่แล้ว กะเอาข้าวคั่วมาตำ แล้วค่อยตำบักพริก

ต่อไปกะมาหั่นผักต่างๆเตรียมเอาไว้ท่า









เอาเนื้อหมูมาหั่นเป็นต่อนพอดีคำ ใส่ลงไปในหม้อ เอาหม้อไปตั้งเตาไฟ

ปรุงเครื่องปรุง น้ำปลา น้ำตาลนำจักหน่อย บักพริกป่น ชิมรสชาติ

คันมักมีน้ำเอาะเย๊าะกะเติมน้ำเปล่าลงไป แล้วกะยกลงมาจากเตาไฟ

เอามาปรุงเพิ่ม ใส่ต้นหอม หอมเป ผักชี กับหัวหอมที่เฮาหั่นไว้ลงไป

คนให้เข้ากัน เติมบักนาว คนอีกเทื่อ สุดท้ายกะจั่งเติมข้าวคั่ว
















แค่นี้กะตักใส่จานได้แล้วล่ะ พร้อมสิชิมกันแล่วบ่ พ่อแม่พี่น้อง

“น้ำตกหมู ของ บักอ้าย”








Create Date : 29 กันยายน 2559
Last Update : 30 ตุลาคม 2559 6:33:12 น.
Counter : 422 Pageviews.

1 comments
  
กินด้วยคนคราบบบบ
โดย: ทนายอ้วน วันที่: 30 กันยายน 2559 เวลา:16:24:39 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ