All Blog
ตอนที่ 37 ขนมหวาน เมนูที่ 3 ลอดช่องสิงคโปร์ 27-10-59








ตอนที่ 37

ขนมหวาน เมนูที่ 3

เมนูพิเศษ ลอดช่องสิงคโปร์เมล่อนญี่ปุ่น







สวัสดีครับผม  เฮากะเดินทางฮ่วมกันมาจนฮอดตอนที่ 37 กันแล้วเนาะครับ

ขอบคุณหล๊ายสำหรับคนที่ติดตามแนวกินอีสานบ้านเฮาของบักอ้ายมาตลอด

มาจนฮอดมื้อนี้ เฮากะคือสิได้ฮู้จักกันหลายขึ้นกว่าเก่าก่อนยุเนาะ



จั่วหัวว่าเมนูพิเศษ กะบ่ได้มีอีหยังพิเศษหลายดอก ย่อนว่ามันเริ่มสิผิดวัตถุประสงค์

บ่แม่นแนวกินอีสานบ้านเฮา แต่ย่อนว่าบักอ้ายอยากกิน กะเลยพิเศษตรงนี้ล่ะ

อย่าฟ้าวเอาเกิ้บดึงใส่หัวบักอ้ายเด้ เพราะว่าอยากให้ลองมากินเมนูนี้ มันทั้งหวาน

ทั้งหอม ทั้งเย็นคักขนาด ขนาดว่าหากชุมเจ้าได้ลองกิน กะสิหลงฮักมันมันอยากสิกินแล้วกินอีก

เมนูที่ว่านี้กะคือ

ลอดช่องสิงค์โปร์ เมล่อนญี่ปุ่น

(ฟังแล้วหรูหราไฮโซสมฐานะทางบ้านของบักอ้ายขนาด รวยบ่รวยขนาดทองตกลง

ไปในโถส้วมบักอ้ายยังบ่เก็บเด้ กดทิ่มโลด ขี้คุยคักเนาะ)



พอดีบักอ้ายไปห้างสรรพสินค้ามา กะได้หมากเมล่อนมานำ

บ่ได้มีไผ๋ให้ดอก ซื้อเอา พอกลับมากะเลยคึดอยากกิน

แล้วสิรออะไรคะ(เห็นเพิ้นเว้า กะอยากเว้านำ)กะเฮ็ดกินสิคะคุณ




พูดถึงลอดช่องสิงคโปร์แล้ว บักอ้ายกะขอสาธยายให้ฟังก่อนจักหน่อยเนาะ

ฟังชื่อแล้วน่าสิมีต้นกำเนิดมาจากประเทศสิงคโปร์คักๆ

แต่ว่าอีหลีแล้ว มันบ่ใช่ มันบ่แม่นเลย ลอดช่องสิงคโปร์กะเป็นขนมของคนไทย

เฮาขนานแท้นี่ล่ะ แต่ก่อนเพิ้นกะเอิ้นว่า ลอดช่อง ซื่อๆ แต่ย่อนว่าย่านมันไปซ้ำ

กับตัวอ้วน ๆ เขียวๆ  อีกอย่างหนึ่งร้านเพิ่นตั้งอยู่ข้างๆ โรงหนังสิงคโปร์  

คนกะะเลยพากันเอิ้นว่า "ลอดช่องสิงคโปร์" มาจนคุมื้อนี้

(ข้อมูลนี้เอามาจากอินเตอร์เน็ตเด้ บักอ้ายบ่ได้มีความฮู้หลายปานนั้นดอก)







เอ้า มาเบิ่งวิธีเฮ็ด กับส่วนผสมนำกัน

ส่วนผสม

ตัวลอดช่องสิงคโปร์  
น้ำเชื่อม
เมล่อนญี่ปุ่น
กะทิกล่อง
น้ำแข็งบดแหลกๆ





ส่วนผสม "น้ำเชื่อม"

น้ำตาลทรายขาว 2 ถ้วย
น้ำเปล่า 1 ถ้วย
ใบเตย  5 ใบ เอามามัดรวมกัน





ส่วนผสม "ตัวลอดช่อง"
แป้งมัน 1/2 ถ้วย
แป้งข้าวเจ้า  2 + 1/2  ช้อนโต๊ะ
น้ำใบเตยคั้น 1/3 ถ้วย








วิธีเฮ็ดทั้งหมด

เริ่มแรกเฮากะมาทำน้ำเชื่อมกันไว้ก่อนโลด เทน้ำตาลทราย กับน้ำเปล่า

ใส่ลงในหม้อ ใช้ช้อนคนให้น้ำตาลกับน้ำเข้ากัน   แล้วใส่ใบเตยมัดลงไป

นำหม้อขึ้นตั้งไฟ ใช้ไฟกลางๆพอบ่ต้องแฮง พอมันเดือด ท่าจนกว่า

น้ำตาลสิเปลี่ยนจากสีขาวขุ่นๆ เป็นน้ำสีใสๆ แล้วจั่งยกลงมา พักเอาไว้ก่อน









เอาเมล่อนมาตักเป็นก้อนกลมๆ ส่วนที่เหลืออย่าทิ่มตัดเป็นชิ้นน้อยๆ

เพิ่มความหอมให้น้ำเชื่อมของเฮาได้เด้อครับ











ต่อมากะมาถึงตัวลอดช่อง กะบ่ยากป่านได๋ดอก  เอาน้ำใบเตยที่เฮาคั้นเอาไว้แล้ว

ไปอุ่นให้มันฮ้อนซะก่อน แล้วกะเอามาเลลงในกาละมังที่มีแป้งที่เฮาเตรียมเอาไว้

ตามสัดส่วนที่บักอ้ายได้บอกไป ค่อยๆเท ค่อยๆคนแป้งไปพร้อม แล้วค่อยๆนวด

แป้งในเนื้อเนียนจนเป็นเนื้อเดียวกัน คันมันติดมือกะเอาแป้งมันมาทามือ

นวดจนสีมันเสมอกัน กะถือว่าโอเคแล้วล่ะ













จากนั้นนำแป้งมันมาโฮยทั้งโต๊ะที่เฮาจะใช้คลึงแป้ง หยิบก้อนแป้งออกมา

แล้วค่อย ๆ ใช้ไม้คลึงแป้ง รีดแป้งออกให้มันเป็นแผ่นบางๆเด้อ กะเอาความหนา

บางคนมักต่อนน้อย บางคนมักต่อนใหญ่ กะเฮ็ดตามที่เฮาต้องการโลด

พอได้แผ่นแป้งกะตัดเป็นเส้นๆ แล้วแต่ความมักคือเก่า

โฮยแป้งมันลงไป มันสิได้บ่ติดกัน







พอได้เส้นลอดช่องสิงคโปร์แล้ว กะเอาไปลวก เอาน้ำใส่กระทะ

ท่าให้น้ำเดือดกะใส่เส้นลอดช่องลงไปต้ม บ่ต้องใช้ไฟแฮง

ต้มจนเส้นสุกเป็นสีใสลอยขึ้นมา แล้วจั่งตักออกมาล้างน้ำเย็น

เส้นลอดช่องกะพร้อมแล้ว (ขออภัยเด้อ บักอ้ายลืมถ่ายรูป)





มาฮอดเวลาสำคัญ หาแก้วงามๆมาตักเส้นลอดช่องใส่ลงไปก่อน

ตามด้วยน้ำเชื่อมหลายน้อยแล้วแต่มักโลด คนพอให้น้ำเชื่อมกับเส้นลอดช่องเข้ากัน

แล้วกะตักเมล่อนที่เฮาหั่นเป็นลูกกลมๆ กับชิ้นน้อยๆใส่ลงไป  

แล้งจั่งโปะหน้าแก้วด้วยน้ำแข็งป่นละเอียด  ราดกะทิลงไปจนเต็มแก้ว

แล้วสุดท้ายเอาก้อนเมล่อนกลมๆมาวาง เฮากะสิได้ ลอดช่องสิงคโปร์ที่ทั้งหวาน

ทั้งหอม ทั้งมัน ทั้งเย็น แถมหน้าตาดีแบบบักอ้ายแล้วเด้อครับ

ขอบอกเลยครับ เมนูพิเศษของบักอ้าย ต้องลองครับ






Create Date : 27 ตุลาคม 2559
Last Update : 30 ตุลาคม 2559 6:43:44 น.
Counter : 734 Pageviews.

0 comments
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

Valentine's Month



บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ