All Blog
ตอนที่ 17 ขนมหวาน เมนูที่ 1 ขนมหัวล้าน 19-9-59







ตอนที่ 17

ขนมหวาน  เมนูที่  1



 ขนมหัวล้าน








หายไปหลายมื้อหลายเวนเนาะ ก็ย้อนว่าพายุ “ราอี”ที่พัดเข้ามา ฝนกะเลยตกตลอดเวลาแม้

กลางคืนกะตกกลางวันกะตก คันอีพายุ “ราอี” พัดไปแล้ว พายุอีหยังหนอที่พัดเข้ามาอีก

ฝนกะคือยังตกอยู่คือเก่า น้ำกะท่วม ไปไส่กะยากแม้ กะเพราะฟ้าฝนนี่ล่ะ

อ้ายเลยบ่มีเวลาไปย่างเล่นตลาด กะเลยบ่มีอีหยังเอามาเฮ็ดแนวกินมาฝากพี่พี่น้องเนาะ

มื้อนี้กลับแล้ว มาพร้อมกับ “ขนมหัวล้าน”

แต่ว่าบักขนมหัวล้านนี่เนาะ อาจสิบ่แม่นขนมของคนอีสานบ้านเฮา100%เด้

  แต่ว่าตอนอ้ายเป็นเด็กน้อย อีแม่กะเฮ็ดให้อ้ายกินหลายเที่ยอยู่

อ้ายกะเลยอยากเฮ็ดคืนให้อีแม่เลาลองได้กินฝีมือของอ้ายเบิ่งแน่คือกัน


มาเบิ่งส่วนผสมของขนมหัวล้านที่คนหัวบ่ล้านเป็นผู้เฮ็ด

(นอกจากหัวบ่ล้าน แล้วยังหล๋อหล่อนำเด้อสู)ยอเจ้าของก่อนนี่ล่ะ มันบ่ค่อยมีคนยอบักอ้ายเนาะ

ต้องบอกเอาไว้ก่อนเด้อว่า การเฮ็ดขนมนี้ บ่ว่าสิเป็นขนมอีหยังกะสร่าง ส่วนผสมนี่สำคัญหลายๆ

คันตวงขาดตวงเกิ้นไปแม้แต่น้อย รสชาติกะสิเปลี่ยนไปทันทีโลด


ส่วนผสมไส้ของขนมหัวล้าน กะมีดังต่อไปนี้

ส่วนของไส้ ไส้ขนมเด้อสู บ่แม่นไส้หมูไส้หมา อย่าเข้าใจผิดเด้

บักถั่วเขียวเราะเปลือก  หรือที่เอิ้นว่า บักถั่วทอง 100 กรัม

น้ำตาลทราย 1ส่วน2ถ้วย ถ้วยนี่ใช้ถ้วยตวงเด้อเอื้อย บ่แม่นถ้วยตาไก่บ้านเฮาดอก

บักพร้าว เอามาผ่าแล้วกะเอากระต่ายขูด คั้นเอาแต่น้ำกะทิมันๆ หรือว่าหัวกะทินั่นล่ะ ตักมา 5 ช้อนโต๊ะ

เกลือจักหน่อย คิดเป็นประมาณ 1ส่วน8 ช้อนชา ประมาณนั่น


ต่อมาเป็นส่วนผสมของตัวแป้ง ขนมหัวล้าน

กะมีแป้งข้าวเหนียว 100 กรัม

น้ำไปต้มให้มันอุ่น 1ส่วน3 ถ้วย



สุดท้ายกะคือส่วนผสมของน้ำเทราดขนม

น้ำหัวกะทิที่คั้นเองตั้งแต่ทีแรก  ถ้วยหนึ่ง

น้ำตาลทราย 2 ช้อนโต๊ะ

กับเกลือ ประมาณปลายช้อนชา  คือเก่า















เตรียมของไว้แล้วฝนกะดันตกลงมาพอดี กะเลยเอาบักพร้าวมาคั้นน้ำกะทิท่าเนาะ

คั้นแล้วฝนกะยังบ่หยุดอีก กะเลยต้องนั่งท่าให้ฝนเซ้าตกซะก่อนแม้











นั่งอยู่สื่อๆกะเบื่อกะเซง กะเลยนั่งฮ้องเพลงท่าให้มันม่วนๆ มันเป็นการฆ่าเวลาไปนำ

ฝนเทลงมา เทลงมา เทลงมา
ให้นาตูฮง นาตูฮง นาตูฮง
ให้ซ้งตูเปียก ซ่งตูเปียก ซ่งตูเปียก
ให้เสื้อตูเปียก เสื้อตูเปียก เสื้อตูเปียก
แมงตับเต่าออกลูกข้างหลัง นั่นแมงอันหยัง
อ๋อ แมงกี่นูน แมงกี่นูน แมงกี่นูน
ใต้ต้นบักเขียบ ต้นบักเขียบ ต้นบักเขียบ
ตอนน้อยๆคือสิเคยฮ้องเพลงนี้กันอยู่เนาะ


ฝนซาเม็ดแล้ว มาๆ ตามบักอ้ายเข้าครัวมา สิพาไปเบิ่งวิธีเฮ็ด ขนมหัวล้าน

ขั้นตอนแรกกะเอาบักถั่วทองมาล้างให้สะอาด ล้างจนกว่าน้ำที่ใช้ล้างจะบ่มีสีเหลือง
หรือว่าล้างจนกว่าน้ำมันสิใสนั่นล่ะ หลังจากนั้นกะเอาบักถั่วทอง แช่น้ำไว้อย่างน้อยสามชั่วโมง
(หรือสิแช่ค้างคืนเอาไว้กะเฮิ่งดีหลาย)แต่ว่าของบักอ้ายแช่เอาไว้แต่มื้อวานแล้ว









บักอ้ายกะเลยเอาบักถั่วทองมานึ่งได้เลย นึ่งจนกว่าสิสุก ใช้เวลาประมาณครึ่งชั่วโมง พอนึ่งสุกแล้ว
กะยกลงมาตากเอาไว้ให้มันเย็นก่อน แล้วค่อยบดให้บักถั่วทองพอหยาบๆ
บ่ต้องแหลกหลายดอก ยามเอาไปผัดเดี๋ยวมันกะสิละเอียดเอง







ตั้งกระทะ เอาถั่วทองนึ่งลงไปผัด ใช้ไฟอ่อนๆเนาะ เพราะว่าอ้ายสิบ่ให้น้ำมัน
ผัดให้เนื้อถั่วทองร่วนดีแล้ว กะเอากะทิกับน้ำตาลแล้วกะเกลือใส่ลงไป ผัดต่อไปเรื่อยๆจน เนื้อมันเหนียว
สังเกตเบิ่งว่าเนื้อถั่วบ่ติดกระทะแล้ว กะตักขึ้นมา
พักเอาไว้จนบ่ฮ้อนแล้ว สิค่อยปั้นๆเป็นก้อนกลมๆเตรียมเอาไว้เป็นไส้เลยกะได้
แต่อ้ายเอาไว้ปั้นทีหลัง มันสิได้พอดีกับแป้งบ่ต้องเหลือทิ่มซื่อๆ








บัดทีนี่กับหันมาเฮ็ดแป้ง
เอาแป้งข้าวเหนียวเทลงไปในชามนวดแป้ง เติมน้ำอุ่นลงไป ค่อยๆเติมไปนวดไปเด้อ
อย่าเติมเที่ยเดียวหมด นวดไปเรื่อยๆจนแป้งบ่ติดมือแล้ว แสดงว่าแป้งใช้ได้แล้วเนาะ
พักแป้งไว้จักสามสิบนาที แล้วจั่งเอาแป้งที่นวดได้ที่แล้ว มาปั้นเป็นก้อนๆกลมๆ
น้อยใหญ่กะแล้วมักโลด แต่ถ้าขนาดกำลังพองามกะก้อนล่ะประมาณ สองนิ้วครึ่ง







ระหว่างที่เฮาห่อไส้อยู่นั้น เฮากะต้มน้ำท่าไปนำกะได้เด้ เพื่อบ่ให้เป็นการเสียเวลา
เคล็ดลับของอ้ายคือเอาใบเตยใส่ลงไปนำ มันสิได้กลิ่นหอมๆ ยามกิน แล้วกะใส่น้ำให้มันหลายๆ
จนเกือบเต็มหม้อพุ่นล่ะ





ห่อไส้เสร็จเรียบร้อยกะสิได้ก่อนกลมๆแบบนี้ บ่แม่นไข่ไก่เด้สู







พอน้ำเดือดเฮากะเอาก้อนขนมกลมๆนี่ล่ะ เอาใส่ลงไปในหม้อที่น้ำกำลังเดือด
บ่ต้องย่านก้อนขนมหัวล้านฮ้อนดอก มันบ่แม่นหัวล้านคน  วิธีสังเกตว่าขนมของเฮาสุกหรือบ่สุก
กะให้สังเกตเบิ่งว่าขนมหัวล้านก้อนที่มันสุกแล้ว มันสิลอยขึ้นมาเหนือน้ำ
เหลี่ยมโหม่งๆคือคนหัวล้านนั่นล่ะ แปลว่ามันสุกแล้ว




เฮ็ดน้ำกะทิสำหรับราดเตรียมเอาไว้ก่อนกะได้ เอากะทิที่เฮาตวงเอาไว้เทใส่กระทะตั้งไฟให้มันแตกมัน
แล้วกะใส่น้ำตาลกับเกลือลงไปท่าให้มันละลาย ตักใส่ถ้วยโลด





ตักก้อนขนมหัวล้านใส่ลงไปในน้ำกะทิที่เฮ็ดแล้ว เอาช้อนตักราดๆให้ทั่วๆหมดทั้งก้อน แค่นี้กะกินได้แล้วเนาะ
บางคนเพิ้นกะกินแต่ก้อนขนมหัวล้าน แต่ว่าอ้ายขอแนะนำให้กินพร้อมน้ำกะทิสำหรับราด
มันสิช่อยให้ขนมแซบขึ้นอีกหลายๆ












จบแล้วครับ ขั้นตอนและวิธีเฮ็ดขนมหัวล้านของบักอ้าย
ลองเฮ็ดกินกันเบิ่งเนาะครับ ฝนตกแบบนี้ ระวังสุขภาพนำเด้อครับ ไปแล้วครับผม บ๊ายบาย



Create Date : 19 กันยายน 2559
Last Update : 30 ตุลาคม 2559 6:25:13 น.
Counter : 670 Pageviews.

1 comments
  
น่ากินสุดๆคราบ ชอบกินขนมโบราณแอบบนี้ครับ หนุบหนับดี
โดย: ทนายอ้วน วันที่: 20 กันยายน 2559 เวลา:11:19:21 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ