All Blog
ตอนที่ 30 อาหารอีสาน เมนูที่ 27 หน่อไม้ส้ม 5-10-59













ตอนที่ 30

แนวกินอีสานบ้านเฮา 100 เมนู  เมนูที่  27

หน่อไม้ส้ม






     หน่อไม้ส้ม ส้มแต่แกงใส่ผักอีตู่

     สเต็กสันหมู มันต้องอยู่คู่กับเหล้าไวน์

     ฟ่าวไปเป็นองค์หญิง ฟ่าวไปนอนอิงคู่กับองค์ชาย

     หน่อไม้ส้มคือจั่งบักอ้าย สมแต่ได้ใกล้ขวดเหล้าขาว




ผู้บ่าวหน้ามนบ่แม่นคนใจฮ้าย ที่ชื่อว่า “บักอ้าย” ถึงแม้สิเป็นแค่หน่อไม้ส้ม

ใกล้ขวดเหล้าขาวแบบอ้ายเพชรเพิ้นว่า แต่บักอ้ายกะภูมิใจในตัวเจ้าของอยู่เด้

อย่าฟ้าวหมั่นไส้คนหมั่นหนังหน้าจั่งบักอ้ายเด้อครับ เกิดเป็นคนคันบ่ให้

กำลังใจเจ้าของ สิท่าให้ผู้ได๋มาให้เนาะครับ



บักอ้ายขอถามแน่จักหน่อย สิได้บ่  ชุมเจ้าจำภาพความทรงจำที่โดนที่สุดได้บ่

(โดนนี้หมายถึงนานที่สุด) ความทรงจำที่เป็นภาพแรกในหัวชุมเจ้าตั่งแต่ยังเป็น

เด็กน้อย  สำหรับบักอ้าย จำได้ว่าบักอ้ายนั่งเล่นกองขี้ดินทรายอยู่หน้าบ้าน

ผู้คนกะแล่นกันให้วุ่นวายไปหมด เกิดอีหยังขึ้นบักอ้ายนั่งแนบเบิ่งตาปริบๆ

กะอายุแค่ห้าขวบเนาะ เลยบ่ฮู้เรื่องฮู้ราวอีหยังกับเพิ้น อีพ่ออุ้มอีแม่ลงมาเฮือน

แล้วน้าทองจันทร์ผัวน้าเถียนกะเอารถมาฮับขับออกไป น้าเถียนดึงบักอ้ายมาอุ้ม

เอื้อยพันจูงมือเอื้อยสมย่างนำน้าเถียนไปบ้านเพิ้น น้าเถียนบอกว่าอีแม่ของบักอ้าย

เป็นมะเร็ง  มะเร็งคืออีหยังอ้ายกะบ่ฮู้จักดอกในตอนนั้น ฮู้แต่ว่าอีแม่ต้องไปฮักษา

โตอยู่โรงพยาบาลตั้งหลายเดือน พออีพ่อกลับบ้านมากะได้แต่นั่งเศร้า

มื้อหนึ่งอีพ่อกะเว้ากับน้าเถียนว่าอยากสิขายนาอันเป็นมูลมังของอีแม่

เพราะว่าตอนนี้บ่มีเงินฮักษาอีแม่แล้ว น้าเถียนสิให้ยืมเงินก่อน  แต่อีพ่อกะบ่เอา

สุดท้ายที่นาของเฮากะเลยถึกขายไป เพื่อเอาเงินมาฮักษาโรคของอีแม่จนหมด

หลายเดือนต่อมา อีแม่กะกลับมาบ้าน ผมทั้งหัวกะบ่มี บักอ้ายโผเข้าไปกอดอีแม่

อีแม่ดึงเอาบักอ้ายขึ้นไปอุ้ม

“แม่บ่เป็นหยังแล้วล่ะลูกหล้า”


นั่นกะคือภาพจำของบักอ้าย เวลาที่คึดฮอดมันขึ้นมา กะแห่งเฮ็ดให้บักอ้าย

ฮักทั้งอีพ่อกับอีแม่หลายขึ้นกว่าเก่าคุเทื่อ



ความทรงจำมันกะคือหน่อไม้ส้มนั่นล่ะ คันเฮา เก็บดองมันให้มันดีๆ

มันกะสิอยู่กับเฮาได้โดนแสนโดน




มาเข้าเรื่องเมนูหน่อไม้ส้มกันเนาะ

วัตถุกะมีแค่ หน่อไม้ เกลือ และกะขวดน้ำเอาไว้ใส่หน่อไม้ส้ม










วิธีเฮ็ดกะเอาหน่อไม้มาปอกเอาเปลือกออก แล้วๆกะเอาไปล้าง หั่นครึ่ง มาสับเป็นเป็นเส้นๆ

แช่น้ำให้ท่วมทิ่มเอาไปข้ามคืน พอตื่นเช้ามากะเทน้ำออก ท่าให้หน่อไม้สะเด็ดน้ำ

เอาหน่อไม้มาคั้นกับเกลือ เกลือนี้บักอ้ายใช้ขีดหนึ่ง ต่อหน่อไม้สับแล้ว โลครึ่ง

ทิ่มเอาไว้อีก 2 ชั่วโมง ให้หน่อไม้นิ่ม แล้วกะน้ำหน่อไม้ออก

ครบเวลา ปั้นเอาน้ำหน่อไม้ออกให้หมด เอาไปเททิ่มเด้อน้ำ บ่เอาเด้

ยัดหน่อไม้ลงไปในขวดน้ำที่เฮาหาเตรียมไว้

เทน้ำสะอาดลงไปให้ท่วมหน่อไม้ของเฮา

สุดท้ายกะเติมน้ำส้มสายชูจักหน่อย หน่อไม้สิได้สีขาวงาม เป็นตาแซบ
































ทิ่มหน่อไม้เอาไว้ 2 มื้อ กะจกออกมากินได้
แต่คันมักส้มๆกะทิ่มเอาไว้อย่างต่ำ 5 มื้อคือจั่งบักอ้าย






เสร็จแล้วครับ การเฮ็ดหน่อไม้ส้ม
เทื่อหน้าบักอ้ายสิเอา เมนู ซุบหน่อไม้ส้มมาฝากเด้อครับเด้อ
ท่าให้หน่อไม้ของบักอ้ายเป็นสาก่อน



Create Date : 05 ตุลาคม 2559
Last Update : 30 ตุลาคม 2559 6:37:47 น.
Counter : 275 Pageviews.

1 comments
  
รอชิมแกงหน่อไม้ส้มคราบ
โดย: ทนายอ้วน วันที่: 6 ตุลาคม 2559 เวลา:7:57:04 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

BlogGang Popular Award#13



บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทานมังสวิรัติถึงแม้มันจะเป็นเรื่องยาก
ถ้าหากเราตั้งใจ ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ