ตอนที่ 13

แกงขี้แหล็ก 2 แบบ

อีสานบ้านนาของเฮา มีเมนูแนวกินหลายๆอย่าง เมนูแนวกินคนอีสาน100เมนู เมนูที่ 13
บักอ้ายเชื่อว่าคนอีสานคุคนต้องเคยกินแม่นบ่
บักอ้ายขอนำเสนอ
“แกงผักขี้เหล็ก” กับ “แกงขี้เหล็ก”











ผักขี้เหล็กถือว่าเป็นผักที่มีคุณค่าทางสมุนไพร แล้วกะสามารถช่อยบรรเทาอาการของโรคได้หลายต่อหลายโรค
ที่สำคัญยังเป็นผักที่หาง่ายๆแล้วกะราคาถืก ฮั่งอยู่อีสานย่างไปหาเก็บเอาตามหัวไฮ่ปลายนากะได้แล้ว

ตอนอ้ายเป็นเด็กน้อยเนาะ ข้างๆบ้านกะปลูกเอาไว้ใกล้ๆต้นผักขา
มื้อไดอยากกินแกงขี้เหล็กกะย่างไปเก็บเอา
แกงใส่หนังควายจี่ไฟ แซ่บหลายๆ
แต่ตอนนี้อ้ายเซ้ากินเนื้อแล้วแม้ กะเลยสิมาแกงใส่แต่ผักขี้เหล็กนี่ล่ะ

มื้อนี้อ้ายไปตลาดเห็นแม่ค้าเอามาขายถุงละ20บาท ได้หลายๆ
อ้ายกะเลยซื้อมาถุงหนึ่ง
“เฮ็ดให้มันแซ่บท้อแม่เฮ็ดให้กินเด้อบักอ้าย”
พุ่นนะแม่ใหญ่นวล แจ่แม่นเลาคักหลาย คันอ้ายเฮ็ดบ่แซ่บท่อเลา
เลาคือสิหัวล่ออ้ายไปอีกหลายมื้อหลายเว้นโลด


มีอีหยังแน่น้อ เครื่องปรุงสำหรับทำแกงขี้เหล็กถ้วยแรกของอ้าย

ผักขี้เหล็ก
หนังควาย จี่ให้สุก ทุบ แล้วต้มให้เปื่อย(คันใส่มันสิแซ่บขึ้นหลายเท่าเด้ แต่อ้ายบ่กินเนื้อ อ้ายเลยบ่ได้ใส่)
ผักอีตู่
ผักขา(อ้ายบ่ค่อยมักกินมัน กะเลยบ่ใส่คือกัน)เฮ็ดแนวอยู่แนวกิน บ่ต้องไปเฮ็ดตามสูตรเป๊ะดอก
เอามัก คันบ่มักอีหยังก็ตัดกะเติมเองโลด บ่มีหยังผิดหยังถืกดอก
ผักบั่ว
บักพริกสด
ใบยานาง
ข่า
หัวคิงไค
ใบบักกรูด
กระเทียม

ส่วนเครื่องปรุงกะบ่มีอีหยังหลายดอก
ปลาร้า
น้ำปลา
น้ำตาล
เกลือ







ส่วนวิธีแกงผักขี้เหล็กกะง่ายๆ ง่ายกว่าเวลากินอีกเด้
เอาผักขี้เหล็กที่ต้มน้ำขมออก ต้มให้มันโดนเติมจนมันจืดก่อน ค่อยพอ
คันบ่ฮู้ว่าป่านใดจึงสิจืดกะลองเอาขึ้นมาชิมเบิ่งกะได้ แล้วๆกะเอาล้างน้ำให้มันสะอาด
แล้วจั่งแบ่งเอาไว้ครึ่งหนึ่ง เอาไว้เฮ็ดแกงอีกถ้วย  




ส่วนที่สิแกงกะเอามาหย่อง เวลาแกงมันจึงสิเข้าเนื้อ
คันสั่นมันบ่อถึงเครื่องเด้ อย่าหาว่าณเดช บ่เตือน




อ้ายลืมบอกไปเนาะ อ้ายนี่ล่ะคือ ณเดชตัวจริงเสียงจริง(555)
เวลาเพิ้นให้รายงานโต อ้ายกะสิบอกว่า
สวัสดีครับ ผมชื่อว่า เด็กชาย ณเดช คุยะคุยะ
(มักดอกจั่งหยอกเล่นเด้อแบรี่เด้อ อย่าเคียดให้อ้ายเด้อ)




ส่วนผักอื่นกะล้างให้สะอาด ผักอีตู่เอามาเด็ดเตรียมไว้ให้พร้อม




แล้วจั่งมาตำเครื่องแกง  หั่นก่อนเด้อ ทั้ง ข่า หัวคิงไค หมากพริก กระเทียม ใบบักกูด
มีผัวกะใช้ผัวตำ มีเมียกะใช้เมียตำ มีแฟนกะใช้แฟนตำ
ส่วนคนบ่มีจักอย่างกะตำเอาเอง
อย่าจ่ม อยากผู้ฮ้ายเองแม้ ผู้ได๋สิเอาเจ้ามาเป็นแฟนน้อ
ขนาดคนรูปหล่อ พ่อรวย คือจั่งบักอ้าย กะจังบ่มีไผ๋มานั่งในหัวใจแม้
(โอ้ยๆๆ พ่อแม่พี่น้องเอ้ย มาเบิ่งบักอันนี้ ย้องเจ้าของกะเป็น ข่อยละอยากหัว)
บางคนเพิ้นกะมักเอาบักพริกใส่เป็นหน่วยๆ กะแล้วแต่มัก เฮ็ดโลด






เสร็จเรียบร้อยกะหันมาหย่องยานาง
หลังจากที่หย่องยานางแล้วเฮาก็ต้องกรองเอากากออกให้เหลือแต่น้ำยานาง
คันมักข้นๆกะหย่องโดนๆ คนบ่มักข้นๆกะหย่องแปบเดียว




ตั้งหม้อเอาใบยานางเทใส่
เอ้า ห่าขั่วเมิงเอ้ย บักอ้าย แก๊สมัน
เอาถังแก๊สน้อยๆมาใช้ก่อนไวๆ ตั้งหม้อน้ำใบยานางตั้งโดนมันกะบ่ฮ้อน
ข่อยมาสูนเด้
ผ่านไปซาวนาที หัวแต่โฟดแม้  พอน้ำเดือดหรือว่าโฟดกะเอาเครื่องแกงที่ตำเอาไว้ใส่ลงไปในหม้อ
คนก่อน
จั่งเอาผักที่เหล็กที่ต้มแล้วกะหย่องเตรียมไว้ใส่ลงไป
หลังจากนั้นกะปรุงรสชาติตามมัก
ใส่เกลือ น้ำปลา น้ำตาล ตามด้วยน้ำปลาร้า
สุดท้ายกะใส่ผักอีตู่
แล้วๆกะตักใส่ถ้วย เอาไปตั้งท่าทั้งพาเข้าโลด




อย่าลืมไปจกส้มผักมากินนำเด้อ
มันเข้ากันดีเด้ ส้มๆกับขมๆนี่













บัดทีนี้กะมาต่อกับแกงขี้เหล็กแบบที่ 2
มาเบิ่งเด้อคนอีสานสิแกงกะทิให้เบิ่ง
อ้ายให้ชื่อว่า “แกงขี้เหล็ก สูตรใส่ปลาทู”




มาแนมเบิ่งส่วนผสมโลดบัดที่นี่
   บักพริกแห้ง กับบักพริกสด อย่างละครึ่ง
หอมแดง
ใบบักกรูด
กระเทียม
หัวคิงไค
เกลือ
กระชาย
ขี้มิ่น
พริกไทย
กะปิ
กะทิ
ผักขี้เหล็กต้มแล้วที่จงไว้จากถ้วยแรก
ปลาทูนิ่ง
น้ำปลา
น้ำตาลปี๊บ
ซีอิ๊วขาว






บ่ต้องเว้าหลายความ มาลงมือกันโลด หิวเข้าแล้วเด้
เอ้า รถเอาแก๊สมาส่งพอดี เข้าๆมาอ้าย ต่อให้นำพร้อมเด้อ
ขอบคุณหลายๆ เตาน้อยๆนี่ซื้อคืนบ่ บ่อยากใช้แล้ว
คนส่งแก๊สกะหล่อๆแม้ ไปๆฟ้าวไป อย่าอยู่โดนหลาย ข่อยสิเฮ็ดแนวกิน
ไปเก็บเงินนำแม่ใหญ่นวลพุ่นเด้อ
แซวผุบ่าวแล้วก็หันมาหั่นผักบั่ว ใบบักกรูด กระเทียม หัวคิงไค
หัวกระชาย ขี้มิ่นหั่นแล้วกะเอาใส่ครกใส่เกลือ พริกไทย กับบักพริกทั้งแห้งแล้วกะสดอย่างละครึ่งลงไปนำ






เอ้า!!ลืมใช้ผู้บ่าวส่งแก๊สตำให้ โอ้ย!!ต้องมาตำเองอีกแล้ว กรรมเวรแท้น้ออ้ายเอ้ย
ตำแหลกแล้วกะหน้าตาเป็นแบบนี้ล่ะ

บัดทีนี่กะเอาปลาทูไปต้ม คันบ่ต้มกะปิ้งกะได้คือกัน สุกแล้วกะเอาเนื้อมาแกะเตรียมไว้




ใส่กะทิตั้งไฟให้มันมันๆก่อน แล้วจั่งเอาเครื่องแกงที่ตำเองทั้งน้ำตาเทลงไป



พอกะทิเริ่มเดือดอีกเทื่อ กะเอาผักขี้เหล็กใส่ลงไป เที่ยนี่บ่ต้องหย่องคือเที่ยแรกเด กะทิมันมันอยู่แล้ว
ท่าให้มันเดือดโดนๆ ให้กะทิซึมเข้าไปในเนื้อผักขี้เหล็ก
ค่อยปลุกรสชาติ ใส่ซีอี๊วขาว น้ำตาล น้ำปลา ชิมเบิ่งตามมักโลด
สุดท้ายกะเอาปลาทูใส่ ต้มต่ออีกจักหน่อย




ค่อยตักขึ้นมาใส่ถ้วย
มื้อนี้กะจบลง กับแกงขี้เหล็กทั้งสองแบบ




อ้ายขอยกใส่พาข้าวพร้อมกับส้มผักกับแจ่วปลาร้า กินคู่กันจังสิแม่นแนวเด้








หวังว่ามื้อนี้คงสิม่วนชื่นและมีความสุขคุผู้คุคนเนาะ ไว้พ้อกันใหม่เด้อครับพ่อแม่พี่น้องของบักอ้าย