๏ดีและ อัชชะในวันนี้ก็เป็นวันดี เป็นวันติถีอันวิเศษ เหตุนั้นหมายมี บรรพชิต สมณะ นักพรต นักบวช ผู้บำเพ็ญ ตังปายในและปายนอก ตังปายในหมายมี พระสงฆ์องคเจ้า ครูบาอาจารย์ นักพรต นักบวช ตังหลาย ตังปายนอกหมายมี ป้อออก แม่ออก กัลยาณมิตร สานุศิษย์ตังหลาย และญาติมิตรสหายนานา จุ๊ผู้จุ๊คน จุ๊ใหญ่น้อยหญิงจาย ตี่ได่มาหื้อป้อนแก่ตั๋วผู้ข้า อ.พรหมสิทธิ์ ทิพย์ธาดาวงศ์ เนื่องในวันคล้ายจ๊ะต๋าวันเกิดแห่งตั๋วผู้ข้า ว่าสันนี้แต๊ดีหลี


๏ทุติยะโกฐากส์ วิภาคอันถ้วนสอง อันตั๋วผู้ข้า อ.พรหมสิทธิ์ ทิพย์ธาดาวงศ์ มาป๋องขอขมาเสีย ยังโทสานุโทษ และปาปะกรรมโทสานุโทษ และปาปะกรรมอันกระทำผิด ด้วยกายกรรม วจีกรรม มโนกรรม และสัญจิจจะก็ดี บ่ได้สัญจิจจะก็ดี ได้ขึ้นที่ต่ำย่ำที่สูง ปมาทะอคาระวะเล่าหน้าจ๋าขวัญ นินทากล่าวโทษ คิดอาฆาตพยาบาท กระทำร้ายหลายประก๋ารก็ดี ก็ขอกล้าดแกล้วยังโทสานุโทษ สิ่งร้ายโสดหลายประการ ขออย่าหื้อได้เป็นนิวรณ์ธรรม กรรมอันจักห้ามเสียยังสัคคะมัคคะผะละนิพพาน แก่ตั๋วกระผมและจุ๊ผู้จุ๊คนจุ๊เยื่องจุ๊ประก๋าร นั้นจุ่งจักมี


๏ตะติยะโกฐากส์ วิภาคอันถ้วนสาม ก่อมีกำปอน กำสอนของพระพุทธเจ้าและองค์พ่อพรหมธาดา ขอหื้อหมู่เฮาเจ้าข้าตังหลาย หื้อหมั่นเจริญ หมั่นเยี๊ยะ หมั่นภาวนา พรหมวิหาร ๔ เมตต๋า กรุณา มุทิต๋า อุเบกข๋า ไปใจ้ๆเน้อหมู่เฮา


เยี๊ยะอีหยั๋งหื้อมี อกเขา-อกเฮา เอื้อ-เกื้อ-กัน หื้อฮู้จักอภัย บ่ถือสาซึ่งกันและกันเน้อ


๏ด้วยกุสะละปุญญะราศีอันนี้นา ขอหื้อมีโชคปี โชคเดือน โชควัน โชคยาม และอายุปี อายุเดือน อายุวัน อายุยาม ตั้งแต่กาละวันนี้เป็นต้นไป จุ่งหื้อเจ้ามุทิตาตังหลายเปิ้กป๊ะละเสียยังภัยยะอุปัททะวะกังวนอนทะรายตังมวล หลับก็หื้อได้เงินหมื่น ตื่นก็หื้อได้เงินแสน แป๋นมื่อเอาหื้อได้เงินบาทเงินเฟื้อง อยู่ก็หื้อมีไชย ไปก็หื้อมีโชค ผาบแป๊ข้าเลิกศัตถูหมู่มารในใจ๋ต๋น กึ๊ดอันใดหื้อสมดั่งคำมักคำผาถนา นั้นจุ่งจักมีแด่เต๊อ โอม มะ อะโห ศานติ สันติโอม๛