หนังสือปีใหม่ ปีเมืองใค้ (ปีกุญช์นพศก) จ.ศ. ๑๓๖๙ ตัว  หนังสือปีใหม่ ปีเมืองใค้ (ปีกุญช์นพศก) จ.ศ. ๑๓๖๙ อธิกมาส ปกติวาร ปกติสุรทิน มังคลวุฑฒิสิริศุภมัสตุ จุลศกราชได้ ๑๓๖๘ ตัว จอฉนำ กัมโพชพิสัย เข้ามาในคิมหันอุตุ จิตรมาส กาฬปักษ์ ทวาทสมี โสรีวารไถงไทภาษาว่าปีรวายเส็ด เดือน ๗ แรม ๑๒ ฅ่ำ พร่ำว่าได้วันเสาร์ วันไทเปิกยี วันที่ ๑๔ เมษายน ยามนั้น รวิสังขานต์ มีตนเรื่อเรืองงามดังฅำสิงคี ประดับตนด้วยนีลอาภรณ์สีเขียว ใส่เครื่องประดับอันงามเลิศแล้วด้วยแก้วมรกตแสงใส มือขวาบนถือหอก มือซ้ายบนถือธนู มือขวาลุ่มถือดาบสรีกัญไชย นอนซะแคงบนหลังพระญาพยัคฆะ คือว่าเสือ จักย้ายจากมีนราศีประเทศ ไปสู่เมษราศีด้วยโคจรวิถี ในยามตูดช้าย เวลา ๑๒ นาฬิกา ๔๓ นาที ๑๒ วินาที ฅนทังหลายจิ่งเรียกว่าสังขานต์ล่อง ยามนั้นยังมีนางเทวดา ผู้ชื่อว่ายามา ยืนถ้ารับเอาขุนสังขานต์ ด้วยเหตุปีนี้สังขานต์ไปวันเสาร์ ฝนหัวปี กลางปี หางปี บ่มีหลาย จักเปนอันตรายแก่ท้าวพระญา เสนาอามาตย์ ปีนี้อังคารตกภูมิแผ่นดิน บ้านเมืองจักมีข้าเสิก็ เข้าของจักแพง ฅนเกิดวันอาทิตย์จักมีลาภ ฅนเกิดวันศุกร์จักมีเคราะห์ ในวันสังขานต์ไปนั้น จุ่งหื้อพากันไปสู่แม่น้ำทางไฅว่ เค้าไม้ใหญ่ อว่ายหน้าไปสู่ทิสะตะวันตกแจ่งใต้ พากันสระเกล้าดำหัว อาบองค์สรงเกศ ด้วยคาถามอันวิเศษว่า สัพพทุกขา สัพพภะยา สัพพะคะหา สัพพอันตรายา วินาสันตุ ปีนี้ศรีอยู่หน้าแฅ่ง กาลกิณีอยู่หน้าผาก จังไรอยู่กระหม่อม เอาส้มป่อยเช็ดฅว่างเสีย ผีหัวหลวงอยู่ทิศอาคเนย์ ดำหัวอย่าเบ่นหน้าไปทางนั้น แล้วมานุ่งผ้าผืนใหม่ เหน็บดอกไม้นามปี ปีนี้ดอกเอื้องเปนพระญาดอก ควรเอาดอกเอื้องเผิ้ง เอื้องฅำ เอื้องสามพอย(ปอย) และดอกเอื้องมอนไข่ ทังหลายเหน็บหื้อเปนมังคละ จักอยู่สุขสวัสดีชะแล ในเดือน ๗ แรม ๑๓ ฅ่ำ ตรงกับวันอาทิตย์ที่ ๑๕ เมษายน ไทได้วันกัดเหม้า เปนวันเน่า ปีนี้มีวันเน่าวันเดียว อย่าได้ทำการมงคลในวันนี้ อย่าได้วิวาทผิดเถียง เดือดด่า จักบ่ดีตลอดปี ในเดือน ๗ แรม ๑๔ ฅ่ำ(เดือนเจ็ดดับ) วันเม็งได้วันจันทร์ ไทได้วันกดสี พระสุริยอาทิตย์เสด็จทิพย์วิมาน ได้เวลากาลได้ยามพาดฅ่ำ เวลา ๑๖ นาฬิกา ๔๐ นาที ๔๘ วินาที ยามนั้นจุลศักราชก็ขึ้นแถม ๑ ตัว เปนจุลศักราช ๑๓๖๙ ตัว กุญชรฉนำกัมโพชพิสัย ไทภาษาว่าปีเมืองใค้ หื้อพากันได้กระทำบุญหื้อทาน ทานเจดีย์ทราย ช่อทุง ไม้ค้ำสรี พากันสระสรงองค์พระพุทธรูปเจ้าและดำหัวครูบาสังฆะ พ่อเถ้าแม่อุ้ย และพ่อแม่ จักเปนบุญบารมีกับตนไปใจ้ใจ้ อยู่สุขสวัสดีไปตลอด ปีนี้เศษ ๑ วอกรักษาปี นกแลรักษาเดือน นกเงือกรักษาป่า ไก่รักษาน้ำ เทวบุตรชื่อทังสตยะรักษาอากาศ กุมภัณฑ์รักษาแผ่นดิน ท้าวพระญาเปนใหญ่แก่ฅน งัวเปนใหญ่แก่สัตว์ ๔ ตีน นกยางเป็นใหญ่แก่สัตว์ ๒ ตีน ไม้ถิมเป็นใหญ่แก่ไม้จิง ไม้มะเทเปนใหญ่แก่ไม้กลวง หญ้าหนิ้วหมูเปนใหญ่กว่าหญ้าทังมวล ไม้พานแขเปนพระญาแก่ไม้ทังมวล ดอกเอื้องเปนพระญาแก่ดอกทังหลาย ขวัญเข้าอยู่ไม้รวก ผีเสื้ออยู่ไม้สะเลียม จักมีภัยอันตรายแก่สัตว์ ๔ ตีน นาคหื้อน้ำ ๓ ตัว บันดาลหื้อฝนตก ๕๐๐ ห่า ชื่อจันทาธิปติ ตกในมหาสมุทร และเขาสัตตปริภัณฑ์ ๒๔๗ ห่า ตกในป่าหิมพานต์ ๑๖๑ ห่า ตกในมนุษย์โลก ๙๒ ห่า ปีนี้เทวดาวางเครื่องประดับหนพายัพ ปาปเคราะห์ตกหนอิสาน ปาปลักขณะอยู่หนหรดี ทิสะเหล่านี้เป็นอัปมงคล บ่ดีไป บ่ดีทำมังคลกรรมแก่บ้านเมือง บ่ดีปกเสามงคลทิสะนั้น จักเสียสรีเตชะ ปีนี้เศษ ๑๐ ชื่อปัตตาธิมาส มีอธิกมาสเดือน ๑๐ สองเทื่อ ควรนิมนต์พระสังฆเจ้าเข้าพรรษาทุติยอาสาฬหะเดือนสิบหลัง จิ่งจักชอบตามโปราณปาเวณี อตีตพุทธศาสนาล่วงแล้ว ๒๕๔๙ พรรษาธิกาปลาย ๑๑ เดือน ปลาย ๑๔ วัน นับแต่วันพระญาวันฅืนหลัง อนาคตศาสนาอันยังจักมาภายหน้าค้างอยู่ ๒๔๕๐ พรรษาปลาย ๑๕ วัน บ่เศษ เหตุนับแต่วันปากปีไปเอามาบวกกันก็เต็ม ๕๐๐๐ ถ้วนบ่มีเศษ เหตุตามฎีกาที่มหาพิลางคสัมมิหรสีเจ้าหากวิสัชนาแต่งแปลงสืบ ๆ มา ก็ปริปุณณาแล้วและ๚๛ พระครูอดุลสีลกิตติ์ วัดธาตุคำ
ยินดีจ๊าดนักครับอ้าย รอมาเมินละ ได้ตามคำขอจริงๆ
โดย: เต้ IP: 203.113.34.9 วันที่: 15 กุมภาพันธ์ 2550 เวลา:22:27:45 น.
ยินดีจ๊าดนักเน่อครับอ้ายเงินยวง ตี่เอามาหื้อกั๋นอ่านครับ
อิอิ ปี๋นี้คนเกิดวันอาทิตย์จักมีลาภอี้นาครับ สาธุของหื้อได้ลาภสองขากำเต๊อะ อิอิ โดย: โตโต้ IP: 68.104.8.44 วันที่: 16 กุมภาพันธ์ 2550 เวลา:3:27:49 น.
|
บทความทั้งหมด
|
|||||||||||||||||||||
 |
|
ผู้ติดตามบล็อก : 1 คน [
รู้ สึ ก ว่ า อ่ า น ย า ก น ะ ค ะ