ส้มเนื้องัว








ตอนแรกว่าสิเขียนเมนู หน่อไม้ส้ม แต่มีพี่น้องเพิ้นอยากกินส้มเนื้องัว

บักอ้ายกะเลยจำเป็นต้องลัดคิวเฮ็ดให้เพิ้นก่อน จั่งได๋กะขอบคุณหลายๆเด้อ

ที่อยากสิลองชิมฝีมือของบักอ้าย คันได้ชิมแล้ว ถึกปากหรือบ่

จั่งได๋กะส่งข่าวส่งคาวมาบอกกันแน่เด้อครับ



สวัสดีครับพ่อแม่พี่น้อง มื้อนี้มักอ้ายกะสิเอาสูตรเฮ็ดส้มเนื้อมาฝาก ส้ม

หรือว่าส้มเนื้องัวนี่อีหลีแล้วเฮ็ดง่ายๆเด้ครับ ส่วนประกอบกะไม่หลาย

เพียงแต่ว่าเนื้องัวคุมื้อนี้มันแพงๆ โลหนึ่งกะเกือบสามร้อย คันบ่จำเป็น

บักอ้ายขอกินหมูดีกว่าเนาะ แต่ได๋ๆกะได๋ๆแล้ว  กะถือโอกาสเอาสูตร

ส้มเนื้องัวมาฝากกันไปเลยคราวเดียวกันเนาะ หลังจากที่เคยเฮ็ดส้มหมู

ห่อใบตองไปแล้วเทื่อหนึ่ง แต่ว่าสูตรของส้มเนื้องัวสิบ่คือส้มเนื้อหมูเด้


เอ้า!!เข้ามาจดกันโลดเด้อครับ


อย่างแรกเลยกะเนื้องัว เลือกเอาส่วนสะโพกหรือว่าเนื้อสันคอ

เพราะว่ามันมีมันน้อยกว่าเนื้องัวส่วนอื่น ซื้อมาโลหนึ่งเด้อครับ

ต่อไปกะคือกระเทียมห้าสิบกรัม ผักบั่วซาวกรัม เกลือช้อนโต๊ะครึ่ง

น้ำตาลช้อนโต๊ะเดียว ข้าวเหนียวห้าสิบกรัม หมากพริกดิบ

แล้วกะถุงกับหนังยางเอาไว้ห่อ











ส่วนวิธีเฮ็ดเฮากะเอาเนื้อไปล้างให้มันสะอาดก่อน เอามาหั่นเป็นต่อนน้อยๆแล้วค่อยเอา

มาสับ (โป๊กๆๆ เสียงอะไร เสียงถึกเขกบักกอกใส่หัว บ่ใช่ เสียงสับหมู บ่แม่น

เสียงสับเนื้องัว แม่นแล้ว)กิโลหนึ่งนี่กะเล่นเอาสับจนล้าคือกันเนาะครับ

เหตุที่บักอ้ายบ่ซื้อเนื้อที่เพิ่นบดเอาไว้แล้วกะเพราะว่าเฮาบ่สามารถเลือกเนื้อต่อนงามๆ

ได้นั่นเอง













สับแล้วกะเอาหัวหอมมาบอกตำเอาไว้ท่า จั่งค่อยตำกระเทียมต่อ













เรียบร้อยกะเอาเนื้องัวใส่ลงไปในชาม คั้นให้น้ำเนื้องัวออกสาก่อน






ใส่ผักบั่วที่ตำแล้วกระเทียมที่ตำแล้ว เกลือ น้ำตาล บีบๆนวดๆ ให้มันเข้ากัน

แล้วจั่งใส่ข้าวเหนียวทีหลัง ที่ใส่ข้าวทีหลังเพราะอ้ายยังอยากให้ข้าวมันยัง

เป็นเม็ดอยู่ บ่อยากให้มันเละ













พอส้มเนื้องัวเฮานวดจนได้ที่แล้ว กะเอามาชั่ง ก้อนหนึ่ง ขีดหนึ่ง





แล้วจั่งเอาใส่ถุงตามด้วยบักพริกดิบหน่วยหนึ่ง แล้วกะเอาหนังยางมัดให้มันงามๆ

เอ็ดจนกว่าเนื้องัวหมด  กะสิได้ส้มเนื้องัวออกมาหน้าตาสั่งซี้เด้อครับพี่น้อง

เรียบร้อยกะเอาส้มเนื้องัวทิ่มเอาไว้จักห้ามื้อแล้วค่อยกิน สิเอาใส่ตู้เย็นหรือเอาไว้

ข้างนอกกะได้ แต่อ้ายแนะนำให้เอาไว้ข้างนอกจักสี่มื้อ พอส้มเนื้องัวของเฮาเป็น

แล้วกะเอาใส่ตู้เย็นไว้ สิได้เก็บเอาไว้กินโดนๆ










จบแล้วครับ ขออนุญาตไปส่งส้มเนื้องัวให้คะเจ้าก่อนเด้อครับ ไว้พ้อกันใหม่ครับผม



หรือคันไผ๋อยากลองชิม บ่อยากเฮ็ดเอง

กะลองตามเพจของบักอ้ายไปกะได้คือกันครับผม

กดโลดครับ


https://www.facebook.com/kidhodesan/