ตอนที่ 58 อาหารอีสาน

เมนูที่  45 ยำบักม่วงกุ้งดอง








บักม่วงข้างบ้านกำลังออกหน่วย กะคือดกคักดกแน่แท้
มื้อนี้บักอ้ายเลยมาแนะนำแนวกินแซบแซ่บ ตามวิถีของบักอ้ายเนาะครับ
กินแล้วมันต่อใจพะนะ
มื้ออื่นบักอ้ายบ่ว่างเด มื้อนี้กะเลยถือโอกาสนี้ยำบักม่วงนี้ล่ะ
ให้คุณแฟนของบักอ้ายกิน เป็นของขวัญวันแห่งความฮัก  
ส่วนแฟนๆที่ติดตามอ่านเรื่องราวของบักอ้ายมา
บักอ้ายกะของส่งเมนูนี้ฝากมาให้คือกัน
เพื่อเป็นการส่งความฮักคุคนให้ในวันเลิฟๆ ว่าซั่น
ขอให้มีความสุขเด้อครับเด้อ

มาเบิ่งส่วนผสมกันครับ
กุ้งสด 10 ตัว
กุ้งฝอยแห้งสีส้ม 3 บ่วง
บักพริก 10 หน่วย
น้ำตาลทราย 1 บ่วง
บักนาว  1 หน่วย หรือว่า 1 บ่วงกะได้คือกัน
น้ำปลา 1 บ่วง
น้ำปลาร้า 1 บ่วง
บักม่วงเอาส้มๆ 1 หน่วย
ผักสะระแหน่ 4 ต้น
ปล . ข่อยมักเจ้า บ่วงหนึ่ง ถ่อกับ ช้อนโต๊ะหนึ่งเด้อ












วิธีเฮ็ด กะบ่ยากปานได๋แม้

ขั้นตอนแรก

เฮ็ดกุ้งดองก่อน
ปลอกกุ้ง เอาส่วนหัวมันออก ผ่าหลังเอาเส้นเมามันออกนำ ล้างให้มันสะอาด
เอาใส่ถ้วย ใส่นำปลาให้มันท่วม ใส่น้ำตาลทรายบ่วงหนึ่ง คนให้เข้ากัน
แล้วเอาไปแช่ตู้เย็นไว้ 2 ชั่วโมงเด้อ ซั่มนี้กะสิได้กุ้งดองแล้วล่ะ











ปลอกบักม่วง หั่นให้เป็นต่อนๆ มักใหญ่น้อยตามใจโลด แล้วเอาใส่ตู้เย็นไว้
(ตอนยำค่อยเอาออกมา บักม่วงสิกรอบแล้วกะเย็น เพิ่มความแซ่บว่าซั่น)









ใบสะระแหน่เอามาเด็ด กุ้งแห้งกะเทออกมาจากถุง บักพริกเอามาตำไว้ท่า












เอาเส้นบักม่วงออกมา เอาบักพริก น้ำปลา น้ำตาล น้ำบักนาว น้ำปลาร้า ใส่ลงไปโลด
เอากุ้งแห้งสีส้มใส่ลงไป ตามด้วยใบสะระแหน่ คนให้มันเข้ากัน

















ค่อยใส่กุ้งดอง แล้วคนอีก






แล้วๆกะตักใส่จาน








กินโลดบัดนี้
เป็นจั่งได๋ แนวกินเฮ็ดง่ายๆ แถมยังแซ่บกว่าอ้ายมาริโอ้กับอ้ายเวียร์มาแก้ผ้ารวมกันอยู่ต่อหน้าอีก