ตอนที่ 76 อาหารอีสาน

เมนูที่  54 หมกหน่อไม้ใส่หมูสามชั้น







หลังจากที่เคยเฮ็ดหมกหน่อไม้ใส่ปลาดุกไปแล้ว
มื้อนี้กะกลับมาพร้อมหมกหน่อไม้ใส่หมูสามชั้น
แต่ว่าขอใช้ฟรอย(เขียนถึกบ่น้อนี่)แทนใบตองเนาะครับ
เพราะว่าหาใบตองบ่ได้


มาเบิ่งเครื่องปรุงก่อนเนาะ
หน่อไม้ลวกดอง
ใบยานาง เอามาคั้นกรองเอาแต่น้ำ
ผักชีลาว
เห็ดเข็มทอง
ต้นหอม
ผักชีไทย
ผักอีตู่
หมูสามชั้น
น้ำปลาร้า
น้ำปลา
แล้วกะน้ำตาล

บัดที่นี่กะมาเบิ่งเครื่องบักพริกแกง
ข้าวสารเหนียวแช่น้ำกะเอาแล้วแต่มัก คันมักเหนียวๆกะใส่หลายๆ
ตะไคร้
หัวข่า อ้ายใส่นำสิได้หอมๆ
พริกแห้ง กับ พริกสดผสมกัน มันจั่งสิแซ่บ
หัวกระชาย
หัวหัวหอมแดง
กระเทียมไทย
ใบมะกรูด












แนมเบิ่งเครื่องกะหลายอยู่ แต่บ่ต้องย่านเด้
มีผักอีหยังขึ้นอยู่ริมรั้ว อยากเก็บมาใส่กะได้คือกัน
บ่มีสูตรตายโตดอกแล้วแต่มักโลด


วิธีเอ็ด กะมีตามนี้
เอาหมูสามชั้นมาหั่นเป็นต่อนๆ
บัดที่นี่กะเอาหน่อไม้มา ใช้ส้อมขูดให้เป็นเส้นยาวๆแบบนี้
แล้วๆกะคั้นเอาน้ำหน่อไม้ออก มันสิจะบ่เฟี่ยน
คั้นแล้วกะเอาไปล้างน้ำให้มันสะอาด
เอาหน่อไม้เป็นเส้นๆมาคั้นกับน้ำใบยานาง
อย่าลืมแบ่งน้ำใบยานางเอาไว้นำเด้อ
คั้นในน้ำใบย่านางซึมเข้าไปในเส้นหน่อไม้
คันบ่คั้นมันสิบ่แซบเด้ เส้นหน่อไม้มันสิแข็ง
จั่งเอาหน่อไม้ไปต้มใส่ใบย่านาง
ต้มตั้ง10นาทีพอ แล้วเอามาล้างน้ำอีกรอบ
แล้วบีบเอาน้ำออกให้เหลือแต่หน่อไม้
แล้วจั่งใส่น้ำยานางลงไปอีกเที่ยหนึ่ง
คั้นให้มันเข้ากัน
เอา เห็ดเข็มทอง ผักชีลาว ผักชีไทย ต้นหอม ผักอีตู่มาหั่นเตรียมไว้
เอาบักพริกแห้ง บักพริกสด กระเทียม หอมแดง ตะไคร้ กระชาย ข่า มาหั่น
แล้วจั่งตำให้มันละเอียด
ตำแล้วกะตำข้าวเบือให้นำแน่เด้อ เอาให้มันป่นๆโลด

หลังจากนั้นกะเติม ผักต่างๆที่เฮาหั่นเตรียมเอาไว้ลงไป
คั้นให้มันเข้ากันอีกจักหน่อย
ใส่ข้าวเบียแล้วคั้น
ใส่หมากพริกแกงแล้วคั้น
ใส่เครื่องปรุงก่อนเด้อ
เติมน้ำปลาร้า น้ำปลา แล้วกะน้ำตาลจักหน่อย
จนได้รสจนเฮาพอใจ
กะเอากระดาษฟรอยมาห่อ
ห่อจนหมด
กะสิได้
หมกหน่อไม้แบบนี้ล่ะ

แล้วๆกะเอาไปนึ่ง
ให้เวลาประมาณ 25 นาที
กะได้เวลาแซ่บแล้ว