พ่อ
สุขสันต์วันเกิดเจ้า
วันเกิดพ่อปี๋นี้ ลูกบ่มีของขวัญจะหื้อ แต่มีเรื่องราวมาเล่าบอกมากมาย
ตะวานี้ นาบ้านเฮาถึงคราวต้องเก็บเกี่ยวแล้ว
อ้ายโหล่ง กะ ใย้บุญ เปิ้นบอกว่า ข้าวนาเฮางามหนัก
คงจะได้หลายหาบ มากกว่าปี๋ก่อน
ข้าวเก่าในยุ้งเหลือหลาย ลูกเอาไปสีเป็นข้าวสารหมดแล้ว
ยุ้งว่างปล่าว รอข้าวใหม่
ข้าวสารเก่าเปิ้นหันหน้าน้อง ก็พลอยแข็งไปตวย แม่เปิ้นจ่มขนาดเลย
เกี่ยวข้าวปี๋นี้ ลูกไปกะแม่ตวย
กึดเติงหาพ่อขนาดเจ้า...
อ้ายโหล่งเปิ้นว่า ขายข้าวได้กะมีเงินส่งหื้อลูกเปิ้นเฮียนหนังสือ
ส่งหนี้ธกส.ได้หลายอยู่
กึดไปแล้ว ลูกเอ็นดูหมู่เขาขนาด
ยะก๋านทั้งปี๋ ได้เงินอยู่ 2-3หมื่น
เจ้านายเปิ้นถ้ากึดจะช่วย กะช่วยเรื่องราคาพืชผลหื้อมันแพงๆเต๊อะเนอะ
บ่ต้องไปยะอะหยังหื้อมากเรื่อง

มะเดี๋ยวนี้ พ่อสุขสบายดีก่อเจ้า
ทราบข่าวพ่อจากความฝันของคนบ้านใกล้
เปิ้นว่าพ่อท่าจะเป็นเทวดา
ใผ๋ฝันหา กะว่าพ่อใส่ชุดขาวๆ ตัวขาวๆ
ลูกกึดไปว่า พ่อต้องเป็นเทวดาแน่ๆเลย
มะเดี๋ยวนี้ อากาศบ้านเฮาเย็นๆแล้วเจ้า
แม่กะสบายดี บ่เจ็บบ่ไข้
เปิ้นกึดปลงได้หลายอย่าง


ลูกถ่ายฮูปนาข้าวบ้านเฮามาฝากหลายอยู่
สีเหลืองทองเต็มตุ่งเต็มนา งามขนาดเลย
เก๊าก๋าสลองกะมีดอกเต็มเก๊า หอมฟุ้งไปทั่วตุ่ง

หื่อพ่อสุขสบายบนสวรรค์ชั้นฟ้าเน้อเจ้า
บ่ต้องเป็นห่วงเป็นใยอะหยัง
หมู่เฮาสุขสบายดี
มีพ่ออยู่ในใจเสมอ...

Create Date : 20 พฤศจิกายน 2549
Last Update : 22 พฤศจิกายน 2549 8:52:35 น.		11 comments
Counter : 722 Pageviews.
Share Tweet