Bloggang.com : เชษฐภัทร - กลิ่นฮักบ่เคยแคล้วคลาด

กลิ่นฮักบ่เคยแคล้วคลาด

๑. ข้าวเหนียวซิ้นทอดนี้ นำฮัก
จากเอิกยายประจักษ์ จิตข้อย
ซี้นงัวรสแซบคัก คือกับ
กินแซบแต่ยังน้อย นึบข้าวคลุกนัว

๒. อยู่ครัวยายนึ่งข้าว ขมีขมัน
ยามไก่บ่ทันขัน คึกฮ้อง
กรนตะเว็นหลับนอนฝัน ฟ้ามืด
ซิ้นทอดกลับปลุกท้อง ทิ่มด้วยกลิ่นหอม

๓. กลิ่นพร้อมปลุกไก่แจ้ จากนอน
ตะเว็นยุรยาตรจร แจ่มฟ้า
หลานชายบอกลาหมอน เมี้ยนเก็บ
ย่องย่างฮอดครัวบ้า บ่นฮ้องหิวหลาย

๔. ยายเฮ็ดข้าวสูตรข้อย คึดจำ
สูตรสอดซิ้นงัวนำ แนบปั้น
ข้อยกินแซบทุกคำ ข้าวสุก
คึดฮอดควมฮักนั้น เนื่องย้อนตอนหลัง

---------------

๕. ตั้งสติเบิ่งจิตให้ เห็นทัน
ตายเปลี่ยนเกิดเวียนผัน ผ่านสิ้น
ยายตายแต่ยังฝัน เฝ้าอิ่ม ใจเนอ
จากรสนัวทอดซิ้น สื่ออ้างเอิกยาย

๖. ฮักหลายแฮงคึดน้ำ- ตาไหล
เพิ่นอยู่สวรรค์ชั้นใด ปากฮ้อง
แซบซิ้นทอดสอดใน ข้าวนึ่ง
คึดฮอดควมฮักท้อง ถั่งทึ้งเถิงเศียร

---------------------

๗. กาลเปลี่ยนบ่เปลี่ยนเต้น ตามกาล
แม้เติบใหญ่ใจชาญ เชี่ยวฮู้
ซิ้นทอดที่โปรดปราน ยังโปรด
เปลี่ยนแต่คนทอดสู้ ตื่นเซ้าเข้าครัว

๘. ควมนัวซิ้นทอดท้น แทนฮัก
จากเอิกเมียประจักษ์ จิตข้อย
ข้าวเหนี่ยวนึ่งหอมคัก คอยปลุก
หอมกลิ่นข้าวปั้นน้อย ปลุกให้ไก่ขัน

๙. บันดาลเนรมิตเอิ้น องค์ตะเว็น
แสงสาดอุ่นกลืนเย็น เยียบไว้
บอกลาพระจันทร์เพ็ญ เพิ่นส่ง ไอเนอ
ตรลบกลิ่นซิ้นไกลใกล้ เกลื่อนเคล้ากลิ่นหอม

๑๐. พร้อมกลิ่นควมฮักเจ้า จัดจาน
เมียฮักเอิ้นผัวขาน ตื่นแล้ว
กินซิ้นทอดนัวนาน เนื้อแซบ
กลิ่นฮักบ่เคยแคล้ว เคลื่อนคล้อยลอยหายฯ

Create Date : 03 พฤศจิกายน 2552
Last Update : 3 พฤศจิกายน 2552 15:21:03 น.
Counter : 321 Pageviews.

0 comments