|
|
นางเทวดาผุ้รับเอาขุนสังขานต์
นางเทวดาผู้รับเอาขุนสังขานต์
ยามสุริยา ไคลคลาคลาดฅ้าย ยกย่างย้าย จากมีนรวายสี
เสด็จจระ โคณวิถี เข้าสู่ธานี รวายสีเมษเจ้า
ขุนสังขานต์ ใสงามบ่เส้า ยามลีลา เมื่อนั้น
คันไปวันทิตย์ บุญมีหน่อชั้น ทรงขี้อั้นนาคา
จากหนวันออก ไปตกนั้นหนา ตามทางมรรคา เสด็จไต่เต้า
มือนึ่งถือปืน และฅ้อนจอมเจ้า ใสสว่างเสี้ยงเรียบเมี้ยน
นางธัมมสรี บ่ผิดแผกเพี้ยน นั่งถ้าแล้วลุกยืนไป
รับองค์หน่อเนื้อ เรืองริทธิ์ส่องใส ยามองค์ท่านไป รวายสีเมษหั้น
ตามในธัมม์ อานิสงส์เฝื้อฝั้น ที่ได้ขีดแต้มแต่งย้อม
คันไปวันจันทร์ ขี่ครุฑหลิ่งน้อม ดั้นจากด้าวยาวไป
มือกำขอช้าง แถมข้างแสงใส กำหอกตวยไป อยู่แท้ใจ้ใจ้
จากออกแจ่งเหนือ เจือตกแจ่งใต้ ตามขียาแห่งท้าว
นางมโหสถ ก็ได้ฟั่งฟ้าว มานั่งถ้ารับเอา
มือถือดอกไม้ แต่งแต้มแกมเหลา เปนดอกเมืองเฮา บ่แม่นดอกใต้
คือว่าพระญา ดอกไม้แท้ไส้ ใสใยยองฟ่องฟื้น
คันไปวันคาร ขี่ยักข์เปนพื้น พาขุนเจ้าเราไป
จากอุตรทิศ ล่องลงจิ่มไกล ทักขิณาใน ไขปันหื้อเสี้ยง
นางสุนันทา เจ้าใบหน้าเกลี้ยง มานอนอยู่ถ้าบ่คร้าน
คันไปวันพุธ เจ้าสายดอกพ้าน สังขานต์ขี่ฅวายดำ
มือทือดอกไม้ แลดาบที่กำ ตนทรงธรรม์ ลีลาไต่เต้า
จากหนบุพพา สู่ปัจฉิมาเข้า ตามกำพีร์กระทู้
มีนางคิรินันทา นั่งถ้าอยู่คู้ มาอยู่ถ้าองค์ฅำ
ลางพร่องนั้น ใส่ชื่อคมขำ มานันทะอัน แถมชื่อของเจ้า
รับต้อนองค์ สังขานต์ยาตร์เต้า ปางเมื่ออั้นบ่แฅล้ว
คันไปวันผัด แต่งตนงามแล้ว อาชาม้าแก้วอันทรง
ยัวริยาตร์ ทั่วด้าวทังขง จากวันตกองค์ สู่หนออกตั้ง
ถือยังกุมภะ แลวีออกกั้ง สองฝ่ายเบื้องหัตถ์ท้าว
นางกัญญา ค่อยเนาะหน่องน้าว นั่งคู้เข่าถ้าดาองค์
เหมาะม่อยเนื้อ หื้อตามประสงค์ นาฏอนงค์ เชียงครานหยั่นหย้อง
ดอกไม้นามปี ตามมีชู่ห้อง นางเอามาชูค้ำ
คันไปวันศุกร์ สังขานต์เลิศล้ำ ขึ้นขี่กล้ำทังงัว
จากอาคไนย์ พอกพลิกหนตัว ก็ยาตรยัว หนพยัพวันท์ไหว้
มือนึ่งทือขวาน เจือจานฅ้อนไสร้ ตนองค์ครานหน่อไธ้
มีนางลิตา เทวาวางไว้ หื้อมารับต้อนสังกรา
นางนึ่งน้อย มานั่งเจียรจา รับสุริยา ที่คลาไต่เต้า
รอบสีเนโร ม่อนดอยจอมเหง้า ปางมหาสังกรานต์เทื่อนี้
คันไปวันเสาร์ ขอจักกล่าวชี้ ขี่ปราสาทแก้วเรืองไร
มือกำไม้ค้อน ไวว่องสว่างใส จากอีสานไป วันตกแจ่งใต้
นางตโปตา องค์ครานที่ไหว้ นั่งเหยียดปาทาอยู่พร้อม
ตามออกในธัมม์ บ่ได้แต่งย้อม เชิญจอมมิ่งเจ้าดาฟัง
วัดหมื่นเงินกอง ต้นเหง้าปางหลัง ที่ได้เอาธัมม์ มาไขบอกแจ้งฯ
สังขานต์ไป บุญมีบอกแจ้ง หากกำใดฟังแล้วสะแม้ง
ก็วางขว้างปันข้าจิ่ม
| Create Date : 04 พฤษภาคม 2552 |
| Last Update : 4 พฤษภาคม 2552 14:26:06 น. |
|
0 comments
|
| Counter : 712 Pageviews. |
 |
|
|
|
|
|
|
ฝากข้อความหลังไมค์
Rss Feed
ผู้ติดตามบล็อก : 1 คน [