All Blog
ตอนที่ 1 อาหารอีสาน เมนูที่ 1 แจ่วเห็ดใส่ปลาทู 30-8-59










     ตอนที่ 1

แนวกินอีสานบ้านเฮา 100 เมนู  เมนูที่  1

 แจ่วเห็ดใส่ปลาทู


ตอนแรกกะบ่ได้คิดว่าสิเกิดการเขียนแนวกินอีสานบ้านเฮา

หนึ่งร้อยเมนู ภายในหนึ่งปีดอก


แค่พอเขียนเล่นม่วนๆไปได้สักระยะหนึ่ง

 กะเลยเกิดอยากสินำเสนออาหารอีสานบ้านเฮา


เพราะว่าห่างเขียนกะห่างคึดฮอดตอนสมัยเป็นเด็กน้อย

กะเคยตกลงใจบอกเจ้าของว่า


สิเขียนแนวกินอีสานบ้านเฮา ให้ครับ ร้อยเมนูภายในหนึ่งปี

จั่งได๋กะมาเอาใจช่อยบักอ้าย ให้เฮ็ดความตั้วใจให้สำเร็จแน่เนาะ



มาเริ่มต้นกับเมนูแรกกันโลด

ไปย่างเล่นตลาดเห็นเห็ดฟางแล้วคึดฮอดแนวกินที่อีแม่เฮ็ดให้กิน

ตอนอยู่อีสานบ้านเฮาหลายเด้


แนมซ้ายแนมขวากะเลยซื้อมา เฮ็ดตำแจ่วเห็ดใส่ปลาทูกินเบิ่งแน่แม้

เฮ็ดแล้ว โอ้ย แซ่บคัก แนวกินบ้านๆ ราคาประหยัด

อ้ายกะเลยเอามาฝาก ผู้บ่าวผู้สาวที่บักอ้ายฮัก

ฮ่าเที่ยสิมีผู้ได๋ คึดฮอดบ้านคือจั่งอ้าย



ถ้วยแรก เป็นแบบแห้งๆ เอาโป้แนบกับข้าวเหนียวปั้นแน่นๆ

 ป้าด เอาหูฉลาม มาแลกอ้ายกะบ่ให้เด้อหล้า





คันมักแบบเอาข้าวเหนียวจ้ำกัน กะใส่น้ำปลาร้าตื่มเข้าไป

ซั่มนี้กะใดแจ่วเห็ดอีกถ้วยแล้วล่ะ





ข้าวเหนียวกะนึ่งเอาเองเนาะ แช่ไว้ก่อนคืนหนึ่งเด้อ

 นึ่งแล้วมันจั่งสินุ่นหลาย





ได้ปลาทูเค็มมานำตัวหนึ่ง กะเลยเอามาห่อใบตองย่างไฟ

 หอมคักขนาด






กินกับผักสดๆ มีผักกาดหิ่น บักเขือ ผักชี กับสตอ (อันนี้อ้ายมักเป็นพิเศษ)




เดี๋ยวสิค่อยๆลงวิธีเฮ็ดให้เบิ่งเด้อ

ขออ้ายเอาข้าวเหนียวตุ้ยแจ่วเห็ดกินก่อน ป้าดแซ่บคักขนาดแม้


มาเบิ่งว่ามีส่วนผสมอีหยังแน่
เห็ดฟาง
ปลาทูนึ่ง
บักพริกชี้ฟ้า แดง
บักพริก
หอมแดง
กระเทียม
ต้นหอม
น้ำปลาร้า ต้มให้สุกก่อนเด้อ
น้ำปลา
ผงชูรส
บักนาว










วิธีเฮ็ดกะบ่ยุ่งยากดอก

ดังไฟก่อนเด้อ ใส่ถ่านย่าง มันจั่งสิหอม

เอาปลาทูห่อใบตองแล้วกะเอาไปย่างไฟ (ใบตองกะหาเอาข้างๆบ้านนี่ล่ะ อ้ายปลูกเอาไว้ต้นหนึ่งเด้อ)











เอาบักพริก หอมแดง กระเทียม  เห็ดฟาง ไปย่างไฟคือกัน







หลังย่างแล้วแล้ว กะเอาทุกอย่างมาแกะ  ส่วนปลาทูเอาแต่เนื้อ เอาก้างออกให้หมด

ระวังก้างตำมือเด้อ มันเจ็บคัก เจ็บข้ามมื้อข้ามคืนเลยเด้

แกะแล้วกะสิได้ แบบนี้ล่ะ

อย่าแอบจกปลาทูใส่ปากเด้อ เดี๋ยวมันสิบ่พอตำ







จากนั้นกะค่อยๆเอาทุกอย่างลงไปตำรวมกันภายในครก

อ้ายแนะนำให้ใช้ครกหินเด้อ มันตำง่ายแล้วกะหอมกว่า


ใส่หอม กระเทียม บักพริกก่อน ตำละเอียดแล้ว

กะค่อยใส่ เห็ดฟางย่าง แล้วกะเนื้อปลาทูย่าง


หลังจากตำจนได้ซำเฮามัก

(อ้ายบ่มักแหลกหลาย ให้มันพอมีเนื้อเอาไว้ย่ำ มันแซ่บกว่า)


แล้วกะค่อยปรุงรสชาติ ใส่ น้ำปลา น้ำปลาร้าต้ม บักนาว และกะชูรส

มักแบบได๋กะปรุงจั๋งซั่นล่ะ แล้วๆกะตักใส่ถ้วย

คันเฮามักแบบน้ำๆ กะเอาน้ำปลาร้าต้มตึ่มเข้าไป แล้วแต่มักเนาะ












ซั่มนี้กะแล้วๆ  ยกไปตุ้ยกับข้าวเหนียวได้โลด

อ้ายรับรองว่ามีผัวผัวมัก มีเมียเมียหลง







จบ แล้วครับผม
เอาไว้พ้อกันใหม่เด้อครับ พี่น้อง
ก่อนไปขอฝากหมอลำให้ฟังจักกลอนเนาะ คันม่วนกะลุกขึ้นมาฟ้อนโลด บ่มีผู้ได๋ว่าเจ้าดอก


คลิกเพื่อดูคลิปวิดีโอ



Create Date : 30 สิงหาคม 2559
Last Update : 30 ตุลาคม 2559 6:09:04 น.
Counter : 1743 Pageviews.

0 comments
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 

บักอ้าย
Location :
  

[ดู Profile ทั้งหมด]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ทำอาหารทานเองไม่ใช่เรื่องยาก
ผมทำได้ คุณก็ทำได้
ผมอยากเป็นแรงบันดาลใจให้คุณ
เชพฆฤณ