All Blog
ตอนที่ 12 อาหารอีสาน เมนูที่ 12 ตำบักหุ่ง 8-9-59








ตอนที่ 12

แนวกินอีสานบ้านเฮา 100 เมนู  เมนูที่  12

ตำบักหุ่ง



คึดอยู่โดนคือคือกัน ว่าสิเอาเมนูอีหยังมานำเสนอให้พ่อแม่พี่น้อง ได้คึดฮอดความเป็นอีสานบ้านเฮา
แนมไปแนมมากะเห็นว่า ตำบักหุ่งนี่ละ ดีที่สุด






เพราะว่าตำบักหุ่งเป็นแนวกินคู่อีสานบ้านเฮา
คันไปไฮ่ไปนา ต่อยบักหุ่งไปนำหน่วยหนึ่งกะแล้วแล้ว
ข้อดีของคนอีสานแบบเฮาๆคือกินง่ายอยู่ง่าย
คนภาคอื่นอาจจะเห็นว่าเฮากินทุกอย่าง
แต่อีหลีแล้ว คนอีสานกินแนวกินที่หาได้รอบๆโตซั่มนั้นดอก
คันสิกินแต่ตำบักหุ่งอย่างเดียวมันกะคือสิง่ายเกิ้น
คันสั่น มากินตำบักหุ่ง กีนกลับเห็ดแล้วกะหอยจูบลวกกะแล้วกันเนาะ




มาเบิ่งส่วนผสมกันโลด
บักหุ่ง(ต่อยเอาจากข้างฮั่วนั้นล่ะ)
บักพริก(มื้อนี้บักอ้ายใช้บักพริกแห้งผสมกับบักพริกสด มันจั่งสิแซบ)
บักเขือขื่น
บักกอก
บักนาว
บักเขือเครือ
กระเทียม
น้ำบักขามเปลียก
เห็ดนางฟ้า
หอยจูบ
ปลาร้า
น้ำปลา
เกลือ
ผงชูรส(จักหน่อย)
และกะอีกะปูดอง คันดองเองฮั่งดี มันสิได้บ่เหม็น











ส่วนวิธีเฮ็ด บ่ว่าคนภาคใดกะคงสิฮู้ๆอยู่แม้
เอาหมากหุ่งมาฝานเปลือกออก แล้วกะสับให้มันเป็นเส้นๆ เอาไปแช่ตู้เย็นเตรียมไว้ เส้นบักหุ่งสิได้กรอบขึ้น








ตำหมากพริกกับกระเทียมกับเกลือให้มันแหลก ใส่เส้นบักหุ่งลงไปนำเด้อ มันสิได้บ่กระเด็นเข้าตา






แล้วๆกะปรุงโลดใส่บักเขือเครือ ตำให้มันแตก
ใส่บักกอก บักเขือเขื่อฝาน
ใส่บักนาว น้ำบักขามเปียก น้ำปลา ผงชูรส ปลาร้า มักรสชาติได๋กะใส่ลงไป
ตำให้มันเข้ากัน พอเข้ากันดีแล้วกะใส่เส้นบักฮุ่งลงไปโลด
ตำให้มันเข้ากัน แล้วค่อนใส่อีปูนาดองลงไปทีหลัง มันสิได้บ่แหลกเกิน
ซั่มนี้กะแล้วๆ ตักใส่จานโลด








แล้วๆกะเอาเห็ดนางฟ้าไปต้ม ตักเอาไว้ก่อน






แล้วจั่งเอาบักหอยจูบต่อยก้นไปต้ม





สุดท้ายเอามาจัดลงจาน
เอาข้าวเหนียวมาตุ้ยกันกับผัก
ซั่มนี้กะแล้วคาบเข้าแล้วเนาะ














เมนูนี้มาง่ายๆเนาะ
ขอให้มีความสุขกับการกินตำบักหุ่ง
อาหารระดับประเทศเด้อครับเด้อ ก่อนไปกะฝากไว้จักเพลงเนาะ
เพลงอ้ายเพชร บักอ้ายมักหลายๆ
http://www.youtube.com/watch?v=Px8C62pxZzw



Create Date : 08 กันยายน 2559
Last Update : 30 ตุลาคม 2559 6:21:05 น.
Counter : 244 Pageviews.

1 comments
  
ขอจกข้าวเหนียวเยอะหน่อยนะคราบ คริๆ
โดย: ทนายอ้วน วันที่: 10 กันยายน 2559 เวลา:17:29:19 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 22 คน [?]



ฝาก Blog คึดฮอดอีสาน นำแน่เด้อครับ

บักอ้ายอยากสิ นำเสนอ อาหารไทย

ในรูปแบบ ของบักอ้ายเอง

หวังว่าสิมีประโยชน์บ่หลาย กะน้อย

ขอบคุณครับผม