All Blog
ตอนที่ 27 อาหารอีสาน เมนูที่ 24 หม่ำหมู 2-10-59










ตอนที่ 27

แนวกินอีสานบ้านเฮา 100 เมนู  เมนูที่  24

หม่ำหมู








หม่ำ หม่ำ หม่ำ

แปลได้หลายอย่างเด้

หม่ำน้อหล้าน้อ  แปลว่า กินเถอะน้อง ใช้กับเด็กน้อย

หม่ำไปโลด แปลว่า วิ่งไปโลด

หม่ำ จ๊กมก นั่นมันตลกร้อยล้าน

หม่ำบักอ้าย อันนี้ล่ะ ค่อยสิแซ่บ



กลับมาแล้วบักอ้ายหน้ามนคนหล่อ กลับมาพร้อม เมนูคู่บ้านคู่เมือง ของคนอีสาน

นั่นกะคือ หม่ำ ย่อนบักอ้ายบ่กินเนื้องัว กะเลยตัดสินใจเฮ็ดหม่ำหมูแทน หม่ำเนื้องัว

หลายคนถามว่า หม่ำคืออีหยัง หม่ำกะคือการถนอมอาหารอย่างหนึ่งนั่นล่ะ

ว่ากันว่า มะรางพ่อใหญ่ต่วน เลาอยากเอาเนื้องัวไปกินระหว่างย่างข้ามภูเขา

เลากะเลยเอาเนื้องัวกับเกลือยัดลงไปในถุงน้ำดีงัว แล้วเอาติดตัวไปนำ

จั่งได้เกิดเป็น หม่ำ อย่างคุมื้อนี้นั่นล่ะ


บ่เว้าหลายความดอกมื้อนี้ เว้ามาหลายแล้ว ขี้คร้าน มาเบิ่งส่วนผสมกันโลด

เนื้อหมู ใช้เนื้อหัวไหล่เด้อ อ้ายซื้อห้างแม๊คโครห้าโล้ให้เพิ้นบดให้พร้อม

แต่ใช้อีหลีแค่ สี่โลสองขีด คันไผ๋เฮ็ดบ่หลายกะเอาไปปรับเอากะได้

ตับหมู 8 ขีด กระเทียม 8 ขีดคือกัน เกลือ 24 กรัม

ข้าวเหนียวเอาไปล้างก่อนเม็ดจั่งบ่ติดกัน 12 กรัม น้ำตาล 10 กรัม

แล้วกะไส้สำหรับกรอก อ้ายซื้อมาโลเดียว









ส่วนวิธีเฮ็ดคือสิบ่ยาก แต่พอเฮ็ดอีหลีกะยุ่งยากอยู่คือกัน โดยเฉพาะขั้นตอนล้างไส้

เอาไปล้างกับแป้งมันกับเกลือ ขูดไขมันออกให้มันหมด อย่าขูดแฮงไส้สิแตก กลับไส้ไปๆมาๆ

ล้างหลายๆรอบจนกว่าสิหมดกลิ่นคาว แล้วเอามาแช่น้ำส้มสายชูเอาไว้จักคาว

เอาตับมาฟักให้มันละเอียดคอยท่า เอากระเทียมมานั่งแกะ แล้วกะเอาไปตำให้แหลก

ได้แล้วกะเอาหมูบดกับตับสับผสมให้มันเข้ากัน ค่อยๆเติมเครื่องคุอย่างตามสัดส่วนทั้งๆที่อ้ายบอกไว้

นวด นวด บีบ บีบ จนกว่าเนื้อหมูกับเครื่องปรุงสิเข้ากันดี สังเกตเบิ่งว่ามันเหนียว

จนปั้นเป็นก้อนได้นั่นล่ะแปลว่าได้ที่แล้ว ต่อไปกะเอาหมูมาปั้นเป็นก้อนท่อๆกันเตรียมเอาไว้

เอาปากขวดน้ำมาตัด เอาไส้มาแล้วใช้มือยัดเนื้อลงไปในไส้ มื้ออ้ายเปื้อนเนื้อไปหมด

ย่อนยัดไส้ผู้เดียวเลยบ่ได้ถ่ายรูปมาให้เบิ่ง ขอโทดหลายๆเด้อ พอยัดแล้ว
















แล้วๆกะกะมัดให้เป็นห่วงเนาะ ยัดไปยัดมา ไส้หมดแม้ ย่อนพ่อค้าให้ไขมันมาหลายโพด

บักอ้ายกะเลยแก้ปัญหาโดยการเอาถุงพลาสติกนี้ล่ะ มาใส่หม่ำแทน

กะเลยได้หม่ำถุงเพิ่มมาอีกแบบหนึ่ง

[img]http://f.ptcdn.info/510/046/000/oenq5gm06dbN4AEYzSc-o.jpg[/img









เสร็จเรียบร้อยแล้ว กะเอาหม่ำของเฮาไปแขวนห้อยต่องแต่งพึ่งลมเอาไว้ในที่ฮ่มๆเด้อ
อย่าให้มันถึกแดด ทิ่มไว้จัก5มื้อ กะเอามากินได้แล้วล่ะ เดี๋ยวคันพอครบห้ามื้อ
อ้ายสิเอารูปหม่ำตอนเป็นแล้วมาให้เบิ่งอีกเทื่อหนึ่งเนาะครับ















หรือคันไผ๋อยากลองชิม บ่อยากเฮ็ดเอง

กะลองตามเพจของบักอ้ายไปกะได้คือกันครับผม

กดโลดครับ


https://www.facebook.com/kidhodesan/




Create Date : 02 ตุลาคม 2559
Last Update : 30 ตุลาคม 2559 6:35:01 น.
Counter : 139 Pageviews.

1 comments
  
น้ำลายไหลเลยอ่า
โดย: ทนายอ้วน วันที่: 3 ตุลาคม 2559 เวลา:16:39:03 น.
ชื่อ :
Comment :
 *ใช้ code html ตกแต่งข้อความได้เฉพาะสมาชิก
 
ยืนยันรหัสความปลอดภัย :
(กรอกตัวเลขที่ปรากฎในภาพ)

บักอ้าย
Location :
  

[ดู Profile ทั้งหมด]
ให้ทิปเจ้าของ Blog [?]
 ฝากข้อความหลังไมค์
 Rss Feed
 Smember
 ผู้ติดตามบล็อก : 23 คน [?]



ฝาก Blog คึดฮอดอีสาน นำแน่เด้อครับ

บักอ้ายอยากสิ นำเสนอ อาหารไทย

ในรูปแบบ ของบักอ้ายเอง

หวังว่าสิมีประโยชน์บ่หลาย กะน้อย

ขอบคุณครับผม